​САЛМАҚ жинаудың 8 түрлі ӘДІСІ

фото: ru.pinterest.com

Артық салмақпен күресіп жүрген жандар бүгінгі күннің өзекті мәселелерінің бірі осы екенін біледі. Артық салмақпен күресіп жүрген жандар «салмақ жинағым келеді» деген сөзді естісе таң қала қарайтыны да жасырын емес. Өйткені, адамдар бір-бірінің мәселелерін түсіне алмайды.

«Арықтық» та «семіздік» секілді уайымға батыратын денсаулық мәселелерінің бірі. Салмақ жинай алмай жүрген жандардың «жанды» жері - «арықсың ғой» деген сөзді есту. Қыз балаға жарасатын да болар бәлкім, бірақ тым аз салмақ, бойыңыз бен салмағыңыздың сәйкес келмеуі сыртқы бейнеңізді ұсқынсыз етіп көрсетіп қана қоймай, денсаулығыңызға да айтарлықтай зақым келтіруі мүмкін. Ал жігіттер «қу сүйек» болғанды қаламайды. Жігітке тән бұлшықеті бұлтылдап, «қара күштің иесі» екендігін сездіру де мәртебе ер азаматтар үшін.

Бірақ, салмақ қосу оңай деп ойлайды көп адамдар. Олар салмақ жинағысы келетін адамға «көп тамақ ішу керек қой» деп ақылын айтып жатады. Бұл үшін тек көп тамақтан да басқа «көмек» керек. Дастархан үстіндегі тамақты бір-ақ жеу бұлшықетке салмақ жинауға кедергі келтіреді. Оған қоса, күнделікті ішіп жүрген тамақтың көлемін екі еселеу керек. Артық қыламын деп, тыртық қылып жүрмес үшін не ішіп, не жеп жүргеніңізге көңіл бөлу керек.

Жаттығу залынан шықпай, тұлғаңызға мән беріп жүріп, аз тамақтанатын болсаңыз, оң нәтиже шықпасы белгілі.

Көлемін екі еселейміз
Егер салмақ қоса алмай жүрсеңіз, тағамдағы калорияны өсіру керек немесе азықты көптеп жеу керек. Мысалы, күнделікті түскі ас кезінде бір тәрелке тауық еті қосылған тағам жесеңіз, енді екі тәрелке жеу керек. Таңғы аста бір ғана жұмыртқа жесеңіз, оны да екі еселеу керек. Энергиялық құнарлығы жоғары тағамдарды молынан жеу керек.

Тамақ ішетін уақытты белгілеу

Салмақ жинау үшін ағзаны уақытқа үйретіп қою керек. Тамақ ішу керек және уақытымен. Ағза 2-3 сағат сайын калория қабылдап отырауы тиіс. Естен шығып кетпес үшін оятқышты пайдалануға болады. Әсіресе, таңғы асты ұмытуға болмайды. Ұйқыдан тұрған соң, 15 минуттан кейін ағзаға калория керек.

Үлкен ыдыстар
Күнделікті азықты екі еселеудің бір әдісі бар. Оның құпиясы - сіз тамақ ішкен ыдыс-аяқта. Егер тәрелкеңіз кішкентай болса, үлкен тәрелкеге алмастырыңыз. Қасық-кесеңізді де үлкейтіңіз. Бастысы көзді үйретіп алсаңыз болғаны, бара-бара асқазаныңыз да үйренісіп кетеді.

Жаттығудан кейінгі дастархан
Жаттығудан бұрын «залдан шыққан соң, тамақ ішу керек» деген қағиданы естен шығармаңыз. Жаттығудан кейінгі аштықты жеңемін деп ойламаңыз. Ағзаны калориямен толтырып отыру керек. Ағза жаттығудан кейінгі жеген асты тойымсыздықпен қабылдайды.

фото: dzen.ru

Жоғары калориялы азық-түлік
Салмақ қоса алмай жүрген адамдар калориясы көп тамақтарды жеу керек. Егер калориясы төмен тамақтарды көптеп жеген жақсы деп ойласаңыз, қателесесіз. Соңғы әдіспен тамақтансаңыз, ас қорыту жүйеңізді бүлдіріп аласыз. Бұлшықет мұндай әдіспен салмақ қоспайды. Жоғары калориялы тағамдарға: жаңғақ, жаңғақ майы, бал, тазартылмаған сұлы, ет, тауық жұмыртқасы және кептірілген жеміс-жидек. Мәзіріңізге бұл тізімдегі тағамдар көптеп жазылса, ағзаңыздан оң нәтиже көре аласыз.

Тұтас жемістерден гөрі одан жасалған тағамды жеп көріңіз, одан езбе жасап, дәрумен ретінде пайдаланыңыз. Сұлы жармасы, попкорн, калориясы аз сорпадан, жылдам даярланатын тағамдардан аулақ болыңыз. Олар адамды тез тойдырып, тез қарын аштырады.

«Есепті» жазып жүріңіз
Әсіресе, жігіттерге не ішіп, не жегенін жазып жүру біртүрлі көрінуі мүмкін. Дегенмен құнарлы тағамдарды жазып жүрсеңіз, бойыңыздан біршама өзгеріс көре аласыз. Апта соңында таразыға өлшеніп, сәйкесінше салмағыңызды да түртіп отырыңыз. Қанша калория жинағаныңызды да көре алатын боласыз.

Уайым да салмақ қосуға кедергі
Тамақтанғанда ештеңе ойламау керек. Дастархан басында кітап, газет оқу, смартфонға телміру, жаңалық тыңдау «семіремін» деген адамға кері әсерін тигізеді. Ойдың бөлінуінен тәбет те жоғалады. Басыңыздағы мәселелерді тамақ ішіп отырып ойлау қауіпті. Жақсы дүниелер ойлап, тәбетпен азықтану керек.

Тамақ ішпей жаттығу жасамаңыз!

Ұйқыдан тұра сала, су ішіп алып, жаттығу залына кіріп кету – қателік. Немесе күн ұзақ нәр татпай, алаңда жүгіру қауіпті. Жаттығудан 3-4 сағат алдын тамақтану керек. Бұл жағдайды жанармайы жоқ немесе түгесілген көлікке теңеп көрейік. Ішінде жанатын майы жоқ көлікпен алысқа ұзап бара алмайсыз ғой?! Міне, ағза да сондай – дәруменге толмаған денені жаттығу залында зорлықпен жаттықтыра алмайсыз.

Дайындаған: Г. Жұмаділдаева,

ERNUR.KZ

Тағы да оқыңыз:

Башпай НЕГЕ ҚИСАЯДЫ?

Иіссуды киімнің ішкі бетіне сепкен дұрыс