Сурет: ru.pinterest.com
Жаз мезгілі – табиғатқа шығу, суға шомылу үшін жақсы болғанмен, жайсыздықтары да бар. Әсіресе, шіліңгір шілдедегі аптап ыстығы жандыға да, жансызға да оңай тимесі анық. Бұл қатарда автокөлік те бар. Жансыз темір ғой дегенмен, ыстықтың салдарынан көлігіңіз істен шығып, жолда қалып қоюыңыз ғажап емес. Себебі жоғары температурада көлік шектен тыс күшпен жұмыс істейді.
Төмендегі кеңестер жаз мезгілінде көлікке қатысты жағымсыз жағдайларға ұрынып қалмауыңызға көмектеседі.
- Аккумуляторға абай болыңыз
Аккумулятормен мәселелер тек қыста ғана болмайды. Шын мәнінде, жазғы ыстық аккумуляторға қыстың суығынан да көп зиян келтіруі мүмкін. Ыстық пен діріл – аккумулятордың басты жаулары.
Ең алдымен, аккумулятордың сенімді бекітілгеніне және қатты дірілдемейтініне көз жеткізу қажет. Тағы бір ықтимал мәселе – сұйықтықтың тез булануы. Бұл клеммалар мен жалғағыштарда коррозия туғызуы мүмкін. Аккумулятор клеммаларындағы және қысқыштардағы тотты тазартып, қысқыштардың берік бекітілгенін және қозғалмайтынын тексеріңіз. Әсіресе ескі аккумуляторларға ерекше назар аударыңыз.
- Қозғалтқышты салқын күйде ұстаңыз
Салқындату жүйесі қозғалтқышты қызып кетуден қорғайды және оны көлік өндірушісінің ұсынысы бойынша жиі шаю қажет. Шаю арасындағы уақытта сұйықтық деңгейін тексеріп, қажет болса өндіруші ұсынған 50/50 қатынасындағы су мен салқындатқыш сұйықтық қоспасын құйыңыз.
Абай болыңыз! Қозғалтқыш қызып тұрған кезде радиатор қақпағын ешқашан ашпаңыз! Қысыммен қайнаған сұйықтық ауыр күйікке әкелуі мүмкін. Салқындату жүйесінің резеңке компоненттері ыстықтың әсерінен тозуға бейім, сондықтан шлангтар мен белбеулерді жарықтар, жұмсарған жерлер немесе басқа ақауларға тексеріңіз.
- Дөңгелектегі қысымды дұрыстаңыз
Жолдың температурасы тым жоғары болғанда дұрыс үрленбеген шиналар қызып кетіп, жарылу қаупін арттырады. Дөңгелектердің (қосалқы дөңгелекті қоса алғанда) қысымын айына кемінде бір рет тексеріп тұрыңыз. Шиналарды тексергенде олар суық болуы керек.
- Сұйықтық деңгейлерін бақылап отырыңыз
Қозғалтқыштағы көптеген сұйықтықтар жылуды таратуға көмектесетін салқындатқыш ретінде қызмет етеді. Егер сұйықтық деңгейі төмен болса, салқындату тиімділігі де азайып, қозғалтқыштың қызып кету қаупі артады. Мотор майы, беріліс қорабы майы, руль гидравликасы мен тежегіш сұйықтығын үнемі тексеріп, олардың тиісті деңгейде екеніне көз жеткізіңіз.
- Жазғы төтенше жағдайларға дайын болыңыз
Алдын ала техникалық қызмет көрсетілсе де, жазда ақаулар орын алуы мүмкін. Көлігіңізде әрдайым төтенше жағдайға арналған жинақ болуы тиіс. Оның құрамына су, бұзылмайтын тағамдар, стартер сымдары, қосалқы батареялары бар шам, төтенше жағдай шамы, негізгі қол құралдары мен алғашқы көмек қобдишасы кіруі қажет.
- Кондиционерге «көмектесіңіз»
Қатты жазғы ыстықта кондиционер жүйесінің маңызы зор. Ол жүргізушінің сергектігі мен көлік қауіпсіздігіне әсер ететін шаршауды азайтады. Егер кондиционер бұрынғыдай салқындатпайтын болса, бұл фреон деңгейінің төмендігін немесе басқа ақауды білдіруі мүмкін. Жүйені сертификатталған маманға тексертіңіз. Сонымен қатар, егер көлігіңізде салон сүзгісі орнатылған болса, оны да тексеріп, қажет болса ауыстыру қажет – бұл жазда ауа айналымын және салқындатуды жақсартуға мүмкіндік береді.
Кондиционер жүйесінің «өмірін» қалай ұзартуға болады?
Көптеген жүргізушілер кондиционерді тек жазда ғана емес, қыста да қосу қажеттігін білмейді. Себебі ол ауадағы ылғалдылықты азайтып, терезелердің булануын болдырмайды. «Профиль» порталының мамандары кондиционердің жұмыс мерзімін ұзартудың жолдарын айтып берді.
Ең алдымен, салқындату жүйесінің жағдайын бақылау қажет: түтіктерді жуып, тот басуға қарсы арнайы құралдармен өңдеу керек. Бұл жүйенің герметикалығының бұзылуына жол бермейді.
Қымбат жөндеуден аулақ болу үшін ақау пайда болған жағдайда бірден сервистік орталықтарға жүгінген дұрыс.
Кондиционердің қыста да жұмыс істеуі маңызды, себебі ұзақ уақыт пайдаланылмаған кезде жүйедегі май төменгі бөлікке ағып кетіп, резеңке тығыздағыштарды майламайды — бұл компрессордың муфтасының қатып қалуына себеп болуы мүмкін.
Сыртқы температура −5 °C пен +5 °C аралығында болғанда салқындату жүйесі өз функциясын дұрыс атқармайды. Жүйеге профилактикалық қызмет көрсету үшін көлікті жылы орынға қойып, сыртқы температураға дейін жылыту қажет.
Егер бұлай жасалмаса, фреон қажетті жылуды ала алмай, газ түріне айналмайды, қатып қалып, ауа ағынының дефлекторлар арқылы өтуіне кедергі келтіреді.
Дайындаған: Бауыржан ЕРМАН,
ТАҒЫ ДА ОҚЫҢЫЗ:
![](/assets/thumbnails/82/82b45f9ef11ff26d37f35df92b513e58.jpg ""Иттің тамағын өзің жеп қойдың ба?": бір жылда 30 келі салмақ қосқан келіншекке күйеуі күшік әкеп берген")
