Тамақты қақпақпен жабудың екі басты себебі бар
Сурет: ЖИ
Күнделікті қарбаласта тамақты жылдам ысытып алу үшін бәріміз де микротолқынды пешке сүйенеміз. Алайда, майлы тағамды бетін жаппай ысытқанда, кейде пеште нағыз жарылыс орын алады.
Өкінішке қарай, мұндай шашырандыларды әр ысытқан сайын сүртіп отыруға көбіміздің уақытымыз жете бермейді. Бірнеше күн тұрған май мен тамақ қалдықтары қайта-қайта қызып, түтіндеп, пештің ішінен жағымсыз күйік иісі шыға бастайды. Бұл тек эстетикалық жағынан жағымсыз болып қоймай, тамақтың сапасына да әсер етеді. Ал кейде тіпті техниканың бұзылуына немесе зиянды бактериялардың көбеюіне алып келеді.
Бұл мәселені шешудің ең қарапайым әрі тиімді жолы – арнайы пластик қалпақша (қақпақты) пайдалану. Ол:
- Тамақ шашырандыларының пеш қабырғаларына түсуінен қорғайды;
- Тағамның табиғи ылғалын сақтап, оның кеуіп кетуіне жол бермейді;
- Пеш бөлшектерінің зақымдану қаупін азайтады.
Алайда, кез келген қақпақты қолдана беруге бола ма? Оны қашан тығыз жабуға болады, ал қашан ашық қалдырған дұрыс? Бірге анықтап көрейік.
Микротолқынды пештегі тамақты неге жабу керек?
Көбісі микротолқынды пеш тамақтың дәмін бұзады, кептіріп жібереді деп жатады. Шын мәнінде, мәселе пеште емес, тамақты қалай ысытатынымызда. Тамақты қақпақпен жабудың екі басты себебі бар:
1. Тағамның шырынды болып қалуы. Тамақ қызған кезде оның құрамындағы су буға айналады. Егер тәрелке ашық тұрса, бу ұшып кетеді де, тамақ кеуіп қалады. Ал қақпақ жабық болса, ылғал іште сақталады. Сондықтан беті жабық болған күріш, макарон, картоп, ет пен балық ысытқаннан кейін де жұмсақ әрі дәмді қалпында қалады.
2. Шашыраудан қорғау. Сорпа, тұздық немесе майлы тамақтар қызғанда жан-жаққа шашырайды. Бүкіл пештің ішін жуғанша, тамақтың үстіне жапқан қалпақты жуа салу әлдеқайда оңай әрі уақытыңызды үнемдейді.
Қақпақтың өзі тамақтың ысуын жылдамдатпайды. Ол тек тамақтың үстінде ылғал орта қалыптастырып, шашыраудан қорғайды.
ЛАЙФХАК! «Теңдестірілген ысыту» ережесі
Микротолқынды пеште тамақты ортасына емес, тәрелкенің шет-шетіне дөңгелете (ортасын бос қалдырып) салса, ыстық ауа мен бу барлық бөлікке тең тарайды. Бұл әдіс тамақтың ортасы мұздай, шеті ыстық болып қалуының алдын алады.
Қақпақтағы тесіктер не үшін керек?
Көптеген қалпақшаларда кішкентай тесіктер немесе арнайы клапан болады. Олар артық будың сыртқа шығуы үшін өте маңызды.
Егер тамақты ауа кірмейтіндей етіп тығыз жауып тастасаңыз, іштегі қысым көтеріліп, қақпақ немесе ыдыс қисайып кетуі мүмкін. Салдарынан сорпаңыз пештің ішіне төгіледі.
Қалпақшаны таңдау және күту лайфхактары
Қалпақша сатып алғанда түбінде BPA Free (бисфенолсыз) немесе PP 5 (полипропилен) белгісі бар пластикті таңдау керек. Арзан пластик ысығанда иіс шығарып, тамаққа сіңіп кетуі мүмкін.
Пластик қалпақша майды тез сіңіреді. Оны жуарда ыстық суға аздап ас содасы мен лимон шырынын қосып жуса, майы да, жиналған иісі де заматта кетеді.
Басқа қақпақпен алмастыруға бола ма?
Микротолқынды пешке арнаған арнайы қалпақ болмаса, тамақтың бетін екінші тәрелкемен немесе тостағанмен де жабуға болады. Бұл да шашырандыдан қорғайды. Тек мына ережелерді ескеріңіз:
- Орын қалдырыңыз. Жапқан ыдыс пен тамақтың арасында бос кеңістік болуы тиіс және бу шығатын кішкене саңылау қалғаны дұрыс.
- Контейнермен ысыту. Контейнерді микротолқынды пешке тек оның сыртында тиісті белгі (микротолқын толқындарының суреті) болса ғана жауып салуға болады.
- Тамақ пленкасын пайдаланбаңыз. Қарапайым полиэтилен пленка 80–100 °C-тан жоғары қызғанда деформацияланып, зиянды токсиндер бөлуі мүмкін. Мамандар микротолқынды пешке тамақ салмас бұрын мұндай пленканы толығымен алып тастауға кеңес береді.
Дүкеннің дайын тамағын қалай ысытамыз?
Егер сіз дүкеннен немесе кафеден дайын тамақ сатып алсаңыз:
- Қаптамасында «Пленканы сәл ашып, ысытыңыз» деп жазылса, қосымша қақпақтың керегі жоқ. Өндіруші бәрін алдын ала есептеп қойған.
- Егер «Пленканы толық алып, тамақты тәрелкеге салыңыз» делінсе, үстіне арнайы қалпақты міндетті түрде жапқан абзал.
ЛАЙФХАК! Майлы тағамдарға арналған «Қағаз сүлгі» тәсілі
Піскен ет, пицца немесе пирожки сияқты өнімдерді ысытқанда пластик қалпақтың орнына бетін ылғал сулықпен (пергамент немесе қағаз майлық) жапса, қамыр қытырлақ қалпын сақтайды. Пластик сияқты бетіне бу жинап, тамақты езіп жібермейді.
Микротолқынды пешке арналған қақпақ-қалпақ – әр үйде болуы тиіс пайдалы бұйым. Ол тамақтың шырындылығын сақтап, пешті таза ұстауға көмектеседі. Ал егер арнайы қалпақ болмаса, микротолқынды пешке жарайтын шыны немесе керамикалық ыдыстарды да қауіпсіз түрде пайдалана аласыз.
Х. ОРАЛ,
ОҚИ ОТЫРЫҢЫЗ:
