IELTS-ке дайындыққа арналған ең тиімді ПЛАТФОРМАЛАР

көрнекілік: ifanglobal.com сайтынан

Қазір шетелде оқуды армандайтын, халықаралық компанияларда жұмыс істегісі келетін немесе жаңа мүмкіндіктерге жол ашқысы келетін студенттер көп. Бірақ IELTS (АЙЛТС) сияқты сынақтан жоғары балл алу үшін тек ағылшын тілін білу жеткіліксіз – дұрыс дайындық қажет. Дайындықтың ең тиімді жолы – заманауи онлайн платформаларды пайдалану. Олар уақыт үнемдеп, жүйелі түрде оқуға мүмкіндік береді.

1. IELTS Online Tests

Бұл сайтта тегін сынақ тесттері бар, яғни өз деңгейіңізді тексеріп, әлсіз тұстарыңызды көре аласыз. Нақты емтихан форматына ұқсас тапсырмалар арқылы уақытты дұрыс басқаруға да үйренесіз. Студенттер үшін ыңғайлысы – әр тесттен кейін дұрыс жауаптарымен салыстырып, қатеңізді бірден түсінуге мүмкіндік бар. Сонымен қатар, сайтта бұрынғы тест сұрақтарына ұқсас нұсқалар жиі кездеседі, бұл сізге үлкен артықшылық береді.

2. BBC Learning English

BBC-дің бұл ресурсы ағылшын тілін күнделікті қолданыста үйренуге көмектеседі. Мұнда бейне сабақтар, подкасттар, сөздік жаттығулар өте көп. Тыңдау бөлімінде қиналатын студенттер үшін таптырмас құрал. Күнделікті жаңалықтар арқылы ағылшын тілінде ойлау дағдыңыз қалыптасады. Бұдан бөлек, бейнелердің мәтіні қоса беріледі, яғни тыңдау қабілетімен бірге оқу дағдыңыз да қатар дамиды.

3. IELTS Liz

Бұл платформаны IELTS мұғалімі Лиз жүргізеді, сондықтан кеңестердің барлығы нақты тәжірибеге негізделген. Әсіресе жазу мен сөйлеу бөлімінде қиналатындар үшін пайдалы. Мұнда үлгі эсселер, сөйлеу тапсырмаларына жауап үлгілері берілген. Лиздің түсіндіруі қарапайым болғандықтан, тіпті күрделі тақырыптар да жеңіл көрінеді. Ал кейбір стратегиялары сізді уақытты үнемдеуге үйретіп, жауап беруде сенімді болуға көмектеседі.

4. Magoosh IELTS

Magoosh – әлемге танымал оқу платформасы. Қысқа бейне сабақтарымен, мобильді қосымшасымен ыңғайлы. Тапсырмаларды орындап болған соң, жүйе сізге қателеріңізді түсіндіріп береді. Көп студенттер бұл платформаны «қалталық репетитор» деп атайды, себебі кез келген уақытта, кез келген жерде сабақ өтуге болады. Сондай-ақ, мұнда сөздік карталар (flashcards) бар, олар жаңа сөздерді тез жаттауға көмектеседі.

5. British Council – LearnEnglish

IELTS-ті ұйымдастыратын ресми орталықтардың бірі болғандықтан, мұнда ең сенімді материалдар ұсынылады. Дайындық курстары, грамматикалық жаттығулар және үлгі тесттер арқылы студент өзін нақты емтиханға дайындай алады. Бұл платформаға сенім артуға болады, өйткені барлық тапсырмалар IELTS талаптарына сәйкес келеді. Сонымен қатар, кейбір курстары сертификат береді, бұл сіздің қосымша жетістігіңізді дәлелдейді.

6. YouTube арналары

Көп студенттер дайындықты YouTube арқылы жасайды, себебі бейнелер тегін әрі қызықты. IELTS Advantage, E2 Test Prep сияқты арналarda тыңдау, оқу, жазу, сөйлеу бойынша кеңестер мен үлгілер бар. Әсіресе сөйлеу бөлімін жақсартқысы келетіндерге пайдалы, себебі мұғалімдер нақты сұрақтарға қалай жауап беру керегін көрсетіп береді. Одан бөлек, пікір қалдыру арқылы басқа студенттермен тәжірибе алмасып, мотивация алуға болады.

IELTS тапсыру – үлкен мақсат, бірақ оған дайындалу қиын ғана емес, қызықты да бола алады. Қазіргі таңда көптеген онлайн платформа студенттерге көмекке келіп отыр. Бірі тыңдау қабілетін дамытады, бірі сөздік қорды арттырады, ал кейбірі нақты стратегияларды үйретеді. Ең бастысы – жалқаулыққа берілмей, күн сайын аз-аздан дайындалып отыру. Уақытты тиімді қолданып, осы платформаларды дұрыс пайдалансаңыз, жоғары балл жинау қолжетімді арманға айналады.