МЕКТЕПКЕ ЖОЛ: биыл жекеменшік мектеп оқушылары да қамтылады

24.07.2025 14:22

265

Аталған қаражат тікелей оқушының мектеп формасы мен аяқ киіміне, оқу құралдарына (дәптер, қалам, сөмке т.б.) және спорттық киімдеріне жұмсалуы тиіс.

«Мектепке жол» республикалық қайырымдылық акциясы аясында мемлекеттік мектептерде білім алатын 56 мыңға жуық оқушыға, сондай-ақ биылғы жылдан бастап жекеменшік мектеп оқушыларына да жаңа оқу жылына дайындық мақсатында көмек көрсету жоспарланған.

Көмек келесі санаттағы отбасылардан шыққан балаларға көрсетіледі:

• атаулы әлеуметтік көмек алуға құқығы бар отбасылар;

• жан басына шаққан табысы күнкөріс деңгейінен төмен отбасылар;

• жетім және ата-анасының қамқорлығынсыз қалған балалар;

• төтенше жағдайлардан зардап шеккен немесе шұғыл жәрдемді қажет ететін отбасылардың балалары;

• мүгедектігі бар балаларды тәрбиелеп отырған немесе қиын жағдайға тап болған отбасылар.

Оқу қорынан қарастырылған материалдық көмек мөлшері — 46 500 теңге. Аталған қаражат тікелей оқушының мектеп формасы мен аяқ киіміне, оқу құралдарына (дәптер, қалам, сөмке т.б.) және спорттық киімдеріне жұмсалуы тиіс.

Ата-аналар немесе заңды өкілдер мектепке тиісті құжаттарды тапсыру арқылы көмекке өтініш бере алады.

Ақпарат үшін айта кетсек, «Мектепке жол» – жыл сайын жаңа оқу жылы қарсаңында өткізілетін республикалық қайырымдылық акциясы. Оның негізгі мақсаты – әлеуметтік жағдайы төмен, көпбалалы және тұрмысы қиын отбасылардан шыққан балаларды жаңа оқу жылына дайындауға көмектесу.

Акция аясында оқушыларға мектеп формасы, аяқ киім, сөмке, кеңсе тауарлары және өзге де оқу құралдары тегін беріледі. Бұл шараға жергілікті атқарушы органдар, демеушілер, кәсіпкерлер, қоғамдық ұйымдар мен еріктілер белсенді қатысады.

Игі бастама балалардың білім алуына қажетті жағдай жасауға, олардың мектепке баруға деген ынтасын арттыруға және әлеуметтік теңсіздікті азайтуға бағытталған. Сонымен қатар, акция қоғамда мейірімділік пен өзара қолдауды нығайтудың бір үлгісі болып саналады.