Облыс құрылғанда бюджет көлемі 251,3 млрд теңге болса, қазір 2 есеге өсіп отыр.
ERNUR.KZ. Биылғы 9 айдың қорытындысы бойынша Абай облысының әлеуметтік-экономикалық даму көрсеткіштерінің оң өсімі сақталды. Көлік саласында 123,4%, байланыста – 106,4%, өңдеу өнеркәсібінде – 101,3%, ішкі саудада – 105,9%, ауыл шаруашылығында – 102,8%, инвестицияда – 103,1% өсім тіркелді. 10 айда мемлекеттік бюджетке облыстан 137,3% өсіммен 441,4 млрд теңге салық пен басқа да міндетті төлемдер түсті. Оның 71,7% – республикалық, 28,3% жергілікті бюджетке түсті. Облыс құрылғанда бюджет көлемі 251,3 млрд теңге болса, қазір 2 есеге өсіп отыр. Облыс бюджетінің көлемі биыл 500,9 млрд теңгені құрады. Бюджеттің 45,4%-ы немесе 227,3 млрд теңгесі әлеуметтік салаға бағытталған. Бұл туралы Абай облысының әкімі Берік Уәли ОКҚ алаңында өткен баспасөз конференциясында хабарлады.
Оның айтуынша, өңірдің тарихи әлеуетін, тың мүмкіндіктері мен көлік-логистика саласындағы потенциалын ескеріп, облыс экономикасын әртараптандыру мақсатында талдау жасалды.
«Облыс дамуының кешенді негізгі бағыттары айқындалып, биыл 17 мамыр күні жергілікті тұрғындарды Өңірдің кешенді даму жоспарымен таныстырдық. Даму жоспарының негізгі бағыттары мыналар: Семей қаласының инфрақұрылымын дамыту үшін якорлық жоба ретінде жаңа шағын аудан құрылысын салу; инвесторларға жағдай жасау, экономиканы әртараптандыру және экономикалық өсімді арттыру үшін индустриалдық аймақтың көлемін ұлғайту; туризмді дамыту; ауыл шаруашылығын дамыту. Бұл – аймақ үшін үлкен бетбұрыс, жүйелі жоспар және межелі міндет», – деді спикер.
Өңірде бизнесті қолдау және инвестиция тарту шаралары қабылданып жатыр. Жыл басынан бері іске асырылып жатқан жобалар саны 29-дан 97-ге дейін артты, ал тартылатын инвестициялар көлемі 2,2 трлн теңгеден 3,5 трлн теңгеге дейін өсті. Олардың ішіндегі 50 жоба Ұлттық цифрлық инвестициялық платформаға енгізілген. Ірі инвестициялық жобалардың бірі – көлемі 577,5 млрд теңгені құрайтын жалпы ұзындығы – 297 шақырым «Аягөз – Бақты» теміржол желісінің құрылысы. Бұл – өңірдің және тұтас еліміздің дамуына тың серпін беретін Мемлекет басшысының тікелей тапсырмасымен басталған үлкен жоба. Мердігер ұйым – China Harbour Engineering Company. 10,5 мың га жер учаскесі резервке қойылған. Жобаның техникалық-экономикалық негіздемесі бекітілді, 2023 жылы іске асыру басталды. Қазіргі уақытта жобаға 30 млрд теңге инвестиция салынды. Нысанды 2027 жылдың желтоқсанында пайдалануға беру жоспарланып отыр.
Бұдан бөлек, өнеркәсіп саласында Түркияның «Miryildiz Kz Ltd.» компаниясы жалпы құны – 480 млн АҚШ долларын құрайтын «Алтын өндіру фабрикасын салу» жобасын іске асыруды бастады. Биыл жалпы сомасы 25,9 млрд теңгеге 453 жұмыс орнын құрумен 14 жобаны іске асыру жоспарланған. Бүгінге 13,3 млрд теңгеге 7 жоба жүзеге асырылды, 124 жұмыс орны құрылды. Жыл соңына дейін құны 12,6 млрд теңгені құрайтын 255 жұмыс орнын құруды көздейтін тағы 7 жобаны іске асыру жоспарланған.
