Түркістан облысында 1235,6 шақырым жолға құрылыс-жөндеу жұмыстары жүргізіледі

Түркістан облысында биыл 1235,6 шақырым жолға құрылыс-жөндеу жұмыстары жүргізіледі, деп хабарлайды ERNUR.KZ.

Биыл Түркістан облысының аумағында құрылыс-жөндеу жұмыстарымен жалпы 289 нысан немесе 1235,6 шақырым жолдар мен көшелер қамтылады. Жыл соңына дейін 233 нысан немесе 951,4 шақырым жол пайдалануға беріледі деп көзделуде. Нақтырақ айтқанда, 24 нысан немесе ұзындығы 225,2 шақырым облыстық маңызы бар жолдар құрылыс-жөндеу жұмыстарымен қамтылып, биыл оның ұзындығы 105,6 шақырымды құрайтын 17 нысаны пайдалануға беріледі. Сонымен қатар 24 нысан немесе 130,7 шақырым аудандық маңызы бар жолдар күрделі және орташа жөндеу жұмыстарымен қамтылмақ. Жыл қорытындысымен ұзындығы 53,7 шақырымды құрайтын 13 нысан пайдалануға беріледі. Елді мекендерде ұзындығы 885,6 шақырымды құрайтын 240 нысанға жөндеу жұмыстары жүргізілуде. Жыл соңына дейін 202 нысан немесе 792,1 шақырым жолдағы жұмыстар аяқталады. Оның ішінде, «Ауыл – Ел бесігі» бағдарламасы бойынша 140 елді мекенде 91 нысан немесе 395,5 шақырым көшелер қамтылады. Биыл 87 нысан немесе 375,6 шақырым көше ел игілігіне беріледі. Бұл туралы облыс әкімі Нұралхан Көшеровтің төрағалығымен өткен аппарат мәжілісінде баяндалды.

Облыс әкімі жауапты басшыларға орын алған кемшіліктерді ретке келтіру бойынша нақты шаралар қабылдауды, автомобиль жолдарын қысқы маусымға дайындығын қатаң бақылауда ұстауды, барлық деңгейдегі жолдардың сапасы мен жұмыстардың уақытылы аяқталуын қадағалауды тапсырды.

Мәжілісте Түркістан облысының жолаушылар көлігі және автомобиль жолдары басқармасының басшысы Қуатжан Жұматаев атқарылған жұмыстар туралы есеп беріп, алдағы жоспарды баяндады. Оның айтуынша, осы жылдың соңына дейін жергілікті маңызы бар жолдардың жақсы және қанағатты жағдайдағы үлесін 94,7%-ге жеткізу жоспарланған.

Нысандардағы жұмыстар мен қолданылып жатқан материалдардың сапасы тапсырысшы, автор, техникалық қадағалаушы мекемелердің, сондай-ақ «Ұлттық жол активтері сапасы орталығы» РМК ТО филиалының тұрақты бақылауында. «Ұлттық жол активтері сапасы орталығы» РМК Түркістан облысы филиалы тарапынан жалпы 872 дана сынама алынып, оның ішінде 297 сынама сәйкес келмегені анықталды. Жол құрылысының нормативтік талаптарға сәйкес келмейтін сынамалары бойынша жауапты мердігер мекемелерге 40-қа жуық ескерту беріліп, жалпы 18,4 млн.теңге айыппұл салынды. Нәтижесінде, мердігер мекемелер есебінен 10 шақырым (421,4 млн.теңге) асфальт жабындысы бұзылып, қайта салынды.

Түркістан облысы аумағында автоматтандырылған өлшеу станцияларын орнатуға 7 жол учаскелері белгіленген. Мұндай станциялар 2024-2025 жылдары Арыс қаласындағы «Арыс-Темірлан», «Арыс-Қабылсай» жолдарына орнатылса, биыл Сайрам ауданындағы «Қарамұрт-Ақсукент» автомобиль жолының бойына 2 жерге орнату бойынша жұмыстар басталды.

Түркістан облысының жолаушылар көлігі және автомобиль жолдары басқармасының шаруашылық жүргізу құқығындағы «Оңтүстік жолдары» МКК облыстық маңызы бар автомобиль жолдарын күтіп ұстау, қауіпсіз көлік қозғалысын ұйымдастыру мақсатында жоспарға сәйкес тиісті жұмыстар атқаруда.

Айта кетейік, Түркістан облысы бойынша автомобиль жолдарының жалпы ұзындығы 17 692 шақырымды құрайды. Оның ішінде, республикалық маңызы бар жолдар – 687 шақырым, облыстық және аудандық маңызы бар жолдар – 3983 шақырым, аудандық маңызы бар жолдар – 1 726 шақырым, елді мекен көшелері – 11 305 шақырым.