Қазақстан СТУДЕНТТЕРІ ала алатын 5 СТИПЕНДИЯ түрі

көрнекілік: stud.kz сайтынан

Бүгінгі таңда Қазақстанда оқитын студенттің бір артықшылығы – түрлі стипендияларға қол жеткізу мүмкіндігі. Бұрын стипендия десе тек мемлекеттік шәкіртақыны елестететінбіз, ал қазір жағдай мүлде өзгерді. Қорлар, компаниялар, университеттердің өздері ұсынатын ондаған бағдарламалар бар. Ең қуантатыны – олардың көпшілігі кез келген белсенді, жақсы оқитын студент үшін қолжетімді.

Алдымен бәріне таныс мемлекеттік стипендиядан бастайық. Бұл – грантпен оқитын студенттердің негізгі қолдауы. Мамандығына қарай көлемі әртүрлі болғанымен, студенттің күнделікті шығынын азайтуға көмектеседі. Оған қоса, сессияны “өте жақсы” тапсырғандарға қосымша үстемақы беріледі. Яғни өз деңгейіңді көтеруге тағы бір мотивация.

Соңғы жылдары аты жиі аталатын бағдарламалардың бірі – Шахмардан Есенов атындағы қордың стипендиясы. Бұл стипендияны көп студент «ең әділ әрі ең пайдалы» деп атап жатады. Себебі талап тек жақсы бағамен шектелмейді: студенттің қоғамдық белсенділігі, ғылыми қызығушылығы, өмірге деген көзқарасы да ескеріледі. Ең маңыздысы – ай сайын берілетін бұл жеңілдік көптеген студенттің оқу шығынын жеңілдетеді. Жеңімпаздардың көбі стипендияны ғылыми жобаларын дамытуға, курстарға қатысуға немесе өз саладағы тәжірибесін арттыруға жұмсайды.

Салалық қауымдастықтар да жастарды қолдауға тырысып келеді. Соның бірі – KazEnergy стипендиясы. Мұнай-газ немесе энергетика саласында оқитын студенттерге арналған бұл бағдарлама – GPA жоғары, өзінің болашақ мамандығына жауапкершілікпен қарайтын жастар үшін жақсы мүмкіндік. Жеңімпаздар оқу жылына қажетті қаржыландыру алып, мамандық бойынша түрлі жобаларға қатысуға мүмкіндік табады.

Әрине, университеттердің өз стипендиялары да бөлек айта кетуге тұрарлық. Мәселен, KIMEP, ҚБТУ, Назарбаев Университеті сияқты ЖОО-ларда академиялық жетістіктерге қарай берілетін арнайы шәкіртақылар бар. Біреуі оқу ақысын жартылай жабуы мүмкін, біреуі толықтай өтеуі мүмкін. Кей университеттер ғылыми жобаларда үздік болған, олимпиада жеңімпаздары немесе әлеуметтік бастамаларға белсенді қатысқан жастарды жеке марапаттайды. Бұл – студенттерге өз қабілетін дамытуға үлкен себеп.

Бұдан бөлек, халықаралық қорлар мен ұйымдардың да Қазақстан студенттеріне арналған стипендиялары бар. Олар көбінесе көшбасшылық қасиетке, белсенділікке, еріктілікке немесе нақты бір бағытқа қызығатын жастарды қолдауға бағытталған. Мұндай бағдарламалар тек ақша беріп қоймайды, сонымен қатар тренингтер, менторлар, жаңа орта, жаңа таныстықтар сыйлайды. Кейбіреулері тіпті студенттің шетелдегі қысқа мерзімді бағдарламаларға қатысуына жағдай жасайды.

Қысқасы, стипендия алу қазір бұрынғыдай қиын, қол жетпес нәрсе емес. Ең бастысы – талаптарды алдын ала қарап, құжатты дұрыс дайындап, өзіңді сенімді көрсету. Әр бағдарлама студент үшін жаңа есік ашады: біреуінің арқасында оқу шығының азаяды, біреуі жаңа орта сыйлайды, енді бірі – сенің кәсіби болашағыңа үлкен қадам болуы мүмкін.