​ШЫМКЕНТТЕ ҚҰТҚАРУШЫЛАРҒА АРНАЙЫ ТЕХНИКАЛАР МЕН ПӘТЕР КІЛТТЕРІ ТАБЫСТАЛДЫ

ERNUR.KZ. Бүгін Шымкент қаласында азаматтық қорғау саласында маңызды әрі тарихи деп айтуға болатын оқиға өтті. Құтқару қызметінің материалдық-техникалық базасын нығайту және қызметкерлердің әлеуметтік жағдайын жақсарту мақсатында арнайы техникалар мен жаңа пәтерлердің кілттері салтанатты түрде табысталды.

Іс-шараға Қазақстан Республикасының Төтенше жағдайлар министрі Шыңғыс Әрінов және Шымкент қаласының әкімі Ғабит Сыздықбеков арнайы қатысты. Айта кету керек, заманауи техникалар қала әкімдігінің қолдауымен сатып алынып, жергілікті бюджет есебінен қаржыландырылды.

Мегаполис басшысы өзінің құттықтау сөзінде бұл бастаманың маңыздылығына тоқталды. Оның айтуынша, жаңа техникалар құтқару бөлімшелерінің жедел әрекет ету қабілетін арттырып қана қоймай, төтенше жағдай кезінде тұрғындардың қауіпсіздігін қамтамасыз етуде шешуші рөл атқарады. Сонымен бірге, әкім мемлекет тарапынан құтқарушыларды әлеуметтік тұрғыдан қолдауға ерекше көңіл бөлініп отырғанын атап өтті.

– "Біз алдағы уақытта да азаматтық қорғау жүйесін нығайтуға бағытталған жұмыстарды жалғастырамыз. Құтқарушылардың қауіпсіздігі мен жұмысына қажет құрал-жабдықтармен қамтамасыз ету – басты басымдықтарымыздың бірі. Техникалық жарақтандырумен қатар, күнделікті халықтың өмірі мен қауіпсіздігін күзететін мамандардың әлеуметтік жағдайын жақсартуға да айрықша назар аударамыз", – деді қала әкімі.

Шара аясында төтенше жағдайлар қызметінің бірнеше қызметкеріне қала әкімдігінің қолдауымен жеңілдетілген ипотекалық бағдарлама бойынша жаңа пәтерлердің кілттері табыс етілді. Бұл бастама құтқарушылардың тұрмыстық мәселелерін шешуге және олардың қызметке деген ынтасын арттыруға мүмкіндік береді.

Салтанатты рәсімнің ең маңызды сәттерінің бірі – құтқару бөлімшелеріне заманауи техникалардың берілуі болды. Олардың қатарында автоцистерналар, сорғы-жеңді автомобильдер, автокрандар, авариялық-құтқару көліктері және көбікті сөндіруге арналған арнайы техникалар бар. Барлығы 40 дана жаңа техника бөлімшелердің қарамағына берілді.

Бұл жаңарту құтқару қызметінің материалдық-техникалық базасын едәуір нығайтып, кез келген төтенше жағдайға жедел және тиімді әрекет етуге жағдай жасайды. Заманауи жабдықтармен қамтылған бөлімшелер өрт сөндіру, апаттық-құтқару және түрлі төтенше жағдайлардың алдын алу жұмыстарын жоғары деңгейде атқара алады.

Министр Шыңғыс Әрінов құтқарушылардың қоғамдағы орны мен қызметінің жауапкершілігін атап өтіп, олардың жанқиярлық еңбегіне алғысын білдірді. Ол сондай-ақ бұл қолдау шаралары алдағы уақытта да жалғасын табатынын жеткізді.

Жаңа техникалар мен тұрғын үйлердің кілттерін табыстау – Шымкент қаласының азаматтық қорғау саласын дамытудағы нақты қадамдардың бірі. Бұл шара тек құтқарушылардың ғана емес, қала тұрғындарының да қауіпсіздігін қамтамасыз етуге бағытталған маңызды бастама болып саналады.