Шымкентте «JAS KEÑES SIYLIGI» 2025 Жастар сыйлығының ерекшеліктері талқыланды

Шымкент қаласында Қазақстан Республикасы Президентінің жанындағы Жастар саясаты жөніндегі кеңестің мүшесі, Haileybury Astana халықаралық мектебінің қазақ тілі мұғалімі Озода Баходирқызы 2025 жылғы «Jas Keñes Siyligi» жастар сыйлығы туралы мәлімет берді.

Бұл сыйлық 2024 жылы Президент жанындағы Жастар саясаты жөніндегі кеңестің бастамасымен құрылған және еліміздің экономикасы мен қоғамдық өмірінің маңызды салаларында ерекше көзге түскен жас мамандарды қолдауды мақсат етеді.

Биылғы жылы сыйлық құрылымында бірқатар жаңалықтар бар: номинациялардың саны былтырғы жетіден онға дейін артты. Жаңа бағыттар ретінде жас ғалымдар, жоғары оқу орындарының оқытушылары мен дәрігерлер, ақпараттық-коммуникациялық технологиялар, креативті индустриялар және атом өнеркәсібі саласының мамандары қамтылды. Сыйлықтың әрбір номинациясы белгілі бір сала қызметкерлеріне арналған. Мәселен, ішкі істер органдары мен қарулы күштер өкілдері, медицина қызметкерлері мен дәрігерлер, өндіріс және тау-кен саласы мамандары, инклюзивті оқу және әлеуметтік мекемелер қызметкерлері, педагогтер мен ғалымдар, құтқарушылар мен өрт сөндірушілер, энергетика мен атом өндірісі қызметкерлері, құрылысшылар мен жұмысшы мамандық өкілдері, агроөнеркәсіп кешені мамандары және ақпараттық технологиялар мен креативті индустрия қызметкерлері өз саласы бойынша қатыса алады.

Сыйлыққа Қазақстанның 35 жасқа толмаған азаматтары үміткер бола алады. Байқауға өтінімдер 2025 жылғы 20 шілдеге дейін арнайы сайт арқылы қабылданады. Конкурстық іріктеу үш кезеңнен тұрады, нәтижесінде әр номинация бойынша екі жеңімпаз, жалпы 20 жеңімпаз анықталады. Жүлде қоры 20 миллион теңгені құрайды, әр жеңімпазға 1 миллион теңгеден беріледі.

Сыйлықтың бас серіктесі және демеушісі – «Brave Talents» компаниясы. Ұйымдастырушылардың айтуынша, «Jas Keñes Siyligi» жастарды қолдау және олардың кәсіби дамуына серпін беру арқылы Қазақстанның барлық өңіріндегі жас мамандардың әлеуетін арттыруды көздейді. Сыйлық пен Кеңестің жұмысы туралы толығығақ ақпаратты арнайы сайттан білуге болады.