Шымкентте 10 мыңға жуық бала жазғы лагерьмен қамтылады

Шымкент қаласында балалардың жазғы демалысын сапалы әрі қызықты ұйымдастыру мақсатында қала сыртындағы бірқатар сауықтыру лагерьлері жұмыс істеп жатыр. Олардың қатарында Машат-Арасан, Бекзат Саттарханов атындағы лагерь, Қарлығаш, Үш бұлақ, Таң-Шолпан, Көктөбе және Айсанар сынды белгілі демалыс орындары бар. Бұл лагерьлер жазғы маусым бойы балаларды қабылдап, олар үшін арнайы дайындалған мәдени, спорттық және танымдық бағдарламалар ұсынады.

2025 жылғы 17 шілдедегі мәлімет бойынша, жазғы демалыс кезеңінде 3 331 бала лагерьлерде демалу мүмкіндігіне ие болды. Қазіргі уақытта да балаларды кезең-кезеңімен лагерьлерге жолдау жұмысы жалғасуда. Бұл ретте әрбір балаға сапалы демалыс пен қауіпсіз орта қамтамасыз етілуіне ерекше мән беріледі.

Лагерь бағдарламалары балалардың тек тынығып қана қоймай, жаңа білім мен дағдылар алуына бағытталған. Мұнда түрлі тренингтер, шығармашылық үйірмелер, спорттық жарыстар және қызықты ойындар өткізіледі. Осындай іс-шаралар балалардың өзара қарым-қатынасын нығайтып, топпен жұмыс істеу қабілетін дамытады. Сонымен қатар, олардың көшбасшылық қасиеттерін оятып, жауапкершілік пен ұйымшылдық дағдыларын қалыптастырады.

Жазғы демалысты ұйымдастыру барысында бірқатар маңызды мәселелер басты назарда ұсталады. Атап айтқанда, балалардың қауіпсіздігі, сапалы әрі құнарлы тамақпен қамтамасыз етілуі, білікті медицина қызметкерлерінің тұрақты бақылауы, сондай-ақ бос уақытты тиімді өткізуге арналған мазмұнды бағдарламалар құрылады.

Атқарылып жатқан жұмыстардың нәтижесін нақты мысалмен айтар болсақ, жақында Шымкент қаласы білім басқармасына қарасты Оқушылар сарайының жанындағы “Ақсу” жазғы сауықтыру лагерінде үшінші ауысым өз мәресіне жетті. Бұл ауысымда лагерь 200 оқушыны қамтып, оларға ұмытылмас әсер мен қуанышты сәттер сыйлады. Балалар шығармашылық байқауларға қатысып, спорттық ойындарда жарысып, достық қарым-қатынастарын нығайтты. Күн сайын түрлі тақырыптық іс-шаралар өткізіліп, әрбір баланың демалысы қызықты әрі пайдалы өтуі үшін барлық жағдай жасалды.

Жалпы алғанда, мұндай жазғы сауықтыру шаралары балалардың денсаулығын жақсартып қана қоймай, олардың жаңа оқу жылына сергек, қуатты және жаңа идеяларға толы күйде оралуына мүмкіндік береді.