Шымкент қаласында мүмкіндігі шектеулі азаматтарды әлеуметтік қолдау шаралары жүйелі түрде күшейтілуде

Бұл бағыттағы жұмыстардың басты мақсаты – әрбір азаматтың қоғам өміріне белсенді араласуына жағдай жасау, олардың өмір сапасын арттыру және тең мүмкіндіктер ортасын қалыптастыру.

Қазіргі таңда қала аумағында ресми түрде 42 479 мүмкіндігі шектеулі азамат тіркелген. Олардың қатарында түрлі санаттағы жандар бар, соның ішінде 8 275-і – 18 жасқа дейінгі мүгедектігі бар балалар. Бұл көрсеткіш – балалар мен ересектерге бірдей қолдау көрсетудің, арнайы бағдарламалар мен қызметтерді жетілдірудің өзектілігін айқындайды.

Мүгедектігі бар азаматтарды қолдаудың тиімді құралдарының бірі – Әлеуметтік қызметтер порталы. Бұл заманауи цифрлық платформа азаматтарға қажетті техникалық оңалту құралдарын, арнайы бейімделген тұрмыстық жабдықтарды, сондай-ақ әлеуметтік қызметтердің түрлерін электрондық форматта алуға мүмкіндік береді. Тұрғындар өзіне қажетті тауар немесе қызмет түрін таңдап, электрондық цифрлық қолтаңба (ЭЦҚ) арқылы онлайн тапсырыс бере алады. Мұндай тәсіл азаматтардың уақытын үнемдеп қана қоймай, ашықтық пен айқындықты қамтамасыз етеді.

Жүйенің тиімділігін арттыру және оны барынша қолжетімді ету мақсатында Шымкент қалалық жұмыспен қамту және әлеуметтік қорғау басқармасының ғимаратында өз-өзіне қызмет көрсету бұрышы ашылды. Мұнда арнайы жабдықталған компьютерлер орнатылып, келушілерге онлайн қызметтерді пайдалануға қолдау көрсетіледі. Сондай-ақ, білікті мамандар әрбір азаматқа жеке кеңес беріп, қажетті құжаттарды рәсімдеуге көмектеседі.

2025 жылдың басынан бері оңалтудың жеке бағдарламасына сәйкес мүмкіндігі шектеулі азаматтардан жалпы саны 41 788 өтініш қабылданды. Оның ішінде 72,2 пайызы, яғни 30 167 өтініш толық қанағаттандырылып, тиісті қызметтер мен құралдар уақтылы жеткізілді. Қалған өтініштер бойынша жұмыстар кезең-кезеңімен жүргізілуде.

Әлеуметтік қызметтер жүйесін цифрландыру – азаматтардың қажеттіліктерін дер кезінде, ашық және ыңғайлы түрде қанағаттандыруға бағытталған маңызды қадам. Бұл бастама тек бюрократиялық кедергілерді азайтып қана қоймай, әлеуметтік қолдаудың сапасын арттыруға септігін тигізеді.

Мұндай жаңашылдықтар инклюзивті қоғам қалыптастыру жолында аса маңызды рөл атқарады. Өйткені, әрбір азаматтың өз әлеуетін толық іске асыруына мүмкіндік беру – өркениетті қоғамның басты құндылықтарының бірі. Шымкент қаласында қолға алынған жүйелі шаралар мен қолдау тетіктері алдағы уақытта да жетілдіріліп, әлеуметтік қорғау саласының сапалы дамуына жол ашпақ.