ШЫМКЕНТ: әлеуметтік мәселелер талқыланған қабылдау өтті

Шымкент қаласындағы «AMANAT» партиясы филиалының Қоғамдық қабылдау бөлмесінде «Құқықтық көмек» жобасы аясында тұрғындармен кезекті кездесу ұйымдастырылды.

Бұл жолы азаматтарды Шымкент қаласының Жұмыспен қамту және әлеуметтік қорғау басқармасының басшысы Жанат Өтебаева жеке қабылдап, әрбір тұрғынның мәселесіне мұқият назар аударды. Қабылдау ашық әрі қолжетімді форматта өтіп, әрбір келуші өз сауалын еркін түрде жеткізе алды.

Келушілердің басым бөлігі әлеуметтік сипаттағы маңызды мәселелерді көтерді. Олардың арасында атаулы әлеуметтік көмек алу тәртібі, тұрақты немесе уақытша жұмысқа орналасу мүмкіндіктері, мүгедектік рәсімдеу және қайта куәландыру секілді сұрақтар жиі қойылды. Мысалы, Қазына көшесінде тұратын зейнеткер азамат емдеу-сауықтыру мекемесіне жолдама алу жолдарын білгісі келіп, тиісті кеңес сұрады. Жанат Өмірсейітқызы оған зейнет жасындағы адамдарға арналған мемлекеттік қолдау бағдарламалары, санаторийлік-курорттық емделуге бөлінетін квоталар, өтініш беру жолдары және қажетті құжаттар тізімі жайында егжей-тегжейлі түсіндіріп берді.

Сонымен қатар, қабылдауға келген жұмыс іздеушілердің бір бөлігі сол сәтте-ақ бос жұмыс орындарына жолданып, нақты көмек алды. Бұл ретте басқарма қызметкерлері жұмыс берушілермен жедел байланысып, үміткерлерді тікелей сұхбаттасуға жіберді. Мұндай жедел әрекет тұрғындардың уақытын үнемдеуге және жұмысқа орналасу процесін жеңілдетуге мүмкіндік берді.

Әрбір өтініш жеке қаралып, қолданыстағы заңнамаға сәйкес шешімдер қабылданды. Егер мәселені бірден шешу мүмкін болмаса, тұрғындарға нақты мерзім мен жауапты маман көрсетілген түсініктеме берілді. Бұл тәсіл ашықтықты қамтамасыз етіп, азаматтардың өз өтініштерінің орындалу барысын бақылауына мүмкіндік туғызды.

– Біз үшін ең маңыздысы – әр азаматтың өтінішіне жауапкершілікпен қарап, заң аясында нақты шешімдер ұсыну. Әлеуметтік көмекке мұқтаж тұрғындарды қолдау – біздің басты парызымыз, – деді Жанат Өмірсейітқызы қабылдау қорытындысында.

Осылайша, жеке қабылдау барысында тұрғындардың нақты мәселелерін шешуге бағытталған нақты қадамдар жасалды. Мұндай кездесулер басқарма мен халық арасындағы байланысты нығайтып, әлеуметтік қолдаудың тиімділігін арттыруға септігін тигізуде.