Шенген визасының ережесі өзгерді: Қазақстандықтарды не күтіп тұр

0
80

Енді Еуропалық Одаққа мүше емес елдердің азаматтары үшін 29 еуропалық елдің сыртқы шекараларын кесіп өтуге арналған жаңа ережелер күшіне енді.


Шенген визасының ережесі өзгерді: Қазақстандықтарды не күтіп тұр

Фото: Ru.freepik.com
ERNUR.KZ. 2025 жылдың 12 қазанынан бастап Еуропалық Одақтың сыртқы шекараларында бірыңғай кіру және шығу жүйесі (EES) кезең-кезеңімен енгізіле бастайды. Еуропалық комиссияның хабарлауынша, бұл жаңашылдық қазақстандықтарға да қатысты, деп жазады Stan.kz.




Енді Еуропалық Одаққа мүше емес елдердің азаматтары үшін 29 еуропалық елдің сыртқы шекараларын кесіп өтуге арналған жаңа ережелер күшіне енді. Бұл ережелер визалық режимнің бар немесе жоқтығына қарамастан қолданылады.

Еуропалық Entry/Exit System (EES) – бұл Шенген аймағының сыртқы шекараларында ЕО азаматтығы жоқтар (сондай-ақ Швейцария азаматтары емес) үшін паспортқа мөр басу жүйесін алмастыратын бірыңғай цифрлық база. Ол әр 180 күн ішінде 90 күнге дейінгі қысқа мерзімді сапарлар үшін қолданылады.

Алты айдан кейін, яғни 2026 жылдың 10 сәуірінен бастап, EES жүйесі қазіргі қолмен мөр басу жүйесін толықтай ауыстырады. Бұл жаңа жүйе Шенген ережелерін қолданатын 29 елде (соның ішінде Норвегия, Исландия, Швейцария және Лихтенштейнде) іске қосылады. Ирландия мен Кипр бұл жүйеге кірмейді.

EES қалай жұмыс істейді?

Бірінші кіру кезінде саяхатшының паспорт деректері тіркеліп, суреті мен саусақ ізі алынады. 12 жасқа дейінгі балалар үшін тек сурет қажет. Кейін жүйе елде болу күндерін автоматты түрде есептеп, рұқсат етілген мерзімнен асып кеткендерді анықтайды.

EES жүйесіне деректерін тапсыру міндеті Шенген шекарасын визасыз кесіп өтетіндерге де, виза алатындарға да қатысты. Тек елде тұруға рұқсаты барлар мен ұлттық ұзақ мерзімді визасы (D санаты) барлар тіркелмейді.

Жаңа ережелер кезең-кезеңімен енгізіледі. 12 қазаннан бастап EES жүйесі Германияның Дюссельдорф әуежайында іске қосылады. Сынақ кезеңінен кейін жүйеге Франкфурт пен Мюнхен әуежайлары қосылады, ал кейін басқа да әуежайларда енгізіледі. Испания бұл күні тек Мадридке келетін бір рейс арқылы осы жүйені тексермек. Нидерландтағы Амстердам Схипхол әуежайы EES жүйесімен тіркеуді 3 қарашадан бастап бастайды.

Ресми ақпаратқа сәйкес, Шенген аймағына өзара шекаралық бақылауы жоқ 29 еуропалық мемлекет кіреді:

  1. Австрия,
  2. Бельгия,
  3. Болгария,
  4. Венгрия,
  5. Германия,
  6. Греция,
  7. Дания,
  8. Исландия,
  9. Испания,
  10. Италия,
  11. Латвия,
  12. Литва,
  13. Лихтенштейн,
  14. Люксембург,
  15. Мальта,
  16. Нидерланды,
  17. Норвегия,
  18. Польша,
  19. Португалия,
  20. Румыния,
  21. Словакия,
  22. Словения,
  23. Финляндия,
  24. Франция,
  25. Хорватия,
  26. Чехия,
  27. Швейцария,
  28. Швеция,
  29. Эстония.