ҚР Ауыл шаруашылығы министрлігі агроөнеркәсіптік кешенге стратегиялық инвесторларды тарту және қолайлы инвестициялық ахуал қалыптастыру бағытында жүйелі жұмыстарды жалғастыруда.
Кездесу барысында Алматы облысы Еңбекшіқазақ ауданында жүгері мен бидайды терең өңдеу бойынша инвестициялық жобаның егжей-тегжейі талқыланды. Жоба заманауи биотехнологияларды енгізуге, қосылған құны жоғары өнім шығаруға және Қазақстанның агроөнеркәсіптік секторының экспорттық әлеуетін арттыруға бағытталған.
Жобаның жалпы инвестиция көлемі 500 миллион АҚШ долларын құрайды, кәсіпорынның жобалық қуаты – жылына 400 мың тонна жүгері мен 500 мың тонна бидай. Өндіріс ауыл шаруашылығы шикізаты негізінде аминқышқылдар, пробиотиктер, сондай-ақ орау мен медициналық бұйымдарды қоса алғанда, биоыдырайтын материалдар шығаруға бағытталады.
Министр Қазақстан мен Қытай арасындағы ынтымақтастықты кеңейтуге мүдделі екенін айтып, инвесторлар үшін қолжетімді салалық преференциялар туралы жан-жақты ақпарат берді. Олардың қатарында салықтық жеңілдіктер, инвестициялық субсидиялар, инфрақұрылым шығындарын өтеу және өзге де мемлекеттік қолдау шаралары бар.
«Бүгінгі кездесу іскерлік әріптестікті нығайту жолындағы маңызды қадамға айналып, екіжақты ынтымақтастықтың толық әлеуетін жүзеге асыруға сеп болады деп сенемін. Қазақстан агроөнеркәсіптік салада жоғары технологиялық жобаларды іске асыру үшін барлық қажетті жағдайды жасап, жан-жақты қолдау көрсетуге дайын», – деді Айдарбек Сапаров.
Өз кезегінде Дэн Сюйхэн компания мамандары қазіргі уақытта жоба жүзеге асырылатын жерді егжей-тегжейлі зерттеп жатқанын жеткізді. Инфрақұрылым, логистикалық мүмкіндіктер, сондай-ақ экономикалық және құқықтық жағдайлар талдануда. Сонымен қатар жобаны кезең-кезеңімен жүзеге асыру стратегиясы әзірленіп жатыр.
Бүгінде Қазақстанда осы бағытта тағы бірнеше ірі жоба жүзеге асырылуда. Атап айтқанда, Түркістан облысында «Казкрахмал» ЖШС жылына 100 мың тонна жүгері өңдейтін зауытты 2025 жылы іске қосуды жоспарлап отыр. Сонымен бірге, Жамбыл облысында Fufeng Group жылына 1 млн тонна өнім шығаратын кәсіпорын құрылысын жүргізуде, оны 2027 жылы іске қосу жоспарланған.
Yili Chuanning Biological Co. компаниясының бастамасын қоса алғанда, бұл жобалардың жүзеге асырылуы еліміздің агроөңдеу саласын сапалы жаңа деңгейге көтеріп, азық-түлік қауіпсіздігін нығайтуға және Қазақстанды өңделген ауыл шаруашылығы өнімдерінің халықаралық нарығындағы сенімді жеткізуші ретінде бекітуге мүмкіндік береді.
