Бас прокуратура Перизат Қайратқа және Ғайни Алашбаеваға қатысты қылмыстық істі мәні бойынша қарау үшін Астана қаласының қылмыстық істер жөніндегі ауданаралық сотына жіберді.
Сурет: Instagram/01pk
ERNUR.KZ. Қазақстанның Бас прокуратурасы бүгін, 2025 жылғы 30 маусымда Перизат Қайрат пен оның анасының ісіне қатысты мәлімдеме жасады, деп жазады zakon.kz.
Таратылған ақпарға сүйенсек, Бас прокуратура Перизат Қайратқа және Ғайни Алашбаеваға қатысты қылмыстық істі мәні бойынша қарау үшін Астана қаласының қылмыстық істер жөніндегі ауданаралық сотына жіберді.
"Аталған адамдар Қазақстан Республикасының азаматтары мен ұйымдарынан мүгедек балаларға, сондай-ақ Қазақстанда су тасқынынан және Таяу Шығыстағы қақтығыстан зардап шеккен адамдарға қайырымдылық көрсету желеуімен жиналған 3 миллиардтан астам теңгені жымқыруда айыпталады",- делінген ақпаратта.
Айта кетсек, 2025 жылдың 28 мамырында Перизат Қайратқа Қазақстан Республикасы Қылмыстық кодексінің 190-бабы – "Алаяқтық" және Қазақстан Республикасы Қылмыстық кодексінің 218-бабы "Қылмыстық жолмен алынған ақшаны заңдастыру" бойынша айып тағылғаны белгілі.
