Отырыс барысында ҰҚШҰ-ға мүше мемлекеттердің Сыртқы істер министрлері халықаралық және аймақтық қауіпсіздіктің өзекті мәселелерін талқылайды.
Фото: ҰҚШҰ
ERNUR.KZ. Бүгін Шолпан-Атада Қырғыз Республикасының Сыртқы істер министрі Жээнбек Кулубаевтың төрағалығымен Ұжымдық қауіпсіздік туралы шарт ұйымына мүше мемлекеттер Сыртқы істер министрлері кеңесінің кезекті отырысы өтеді, деп жазады inform.kz.
Отырыс барысында ҰҚШҰ-ға мүше мемлекеттердің Сыртқы істер министрлері халықаралық және аймақтық қауіпсіздіктің өзекті мәселелерін талқылайды. Терроризмге, экстремизмге, трансұлттық қылмысқа, сондай-ақ жаңа қауіп-қатерлерге, соның ішінде қазіргі әлемде маңыздылығы артып отырған киберқауіпсіздік пен ақпараттық сын-қатерлерге қарсы тұруға ерекше назар аударылатын болады.
Іс-шара қорытындысы бойынша мүше мемлекеттер арасындағы өзара іс-қимылды нығайтуға, интеграцияны тереңдетуге және ұйым аясында бірлескен бастамаларды дамытуға бағытталған бірқатар маңызды құжаттарға қол қойылады.
- Бұл келісімдер аймақтық қауіпсіздік пен тұрақтылықты қамтамасыз етуде тиімді ынтымақтастық пен үйлестіруге негіз болады, - деп хабарлады Қырғызстан Сыртқы істер министрлігі.
Мамыр айында Бішкекте ҰҚШҰ парламентшілері есірткі және киберқылмыспен күресу шараларын талқылады.
