ТҮРКІСТАН: Нұралхан Көшеров франциялық «Orano» компаниялар тобының басшысымен кездесті

Түркістан облысының әкімі Нұралхан Көшеров франциялық «Orano» компаниялар тобының басшысы Николя Маспен кездесті, деп хабарлайды ERNUR.KZ.

Түркістан облысының әкімі Нұралхан Көшеров Францияның «Orano» компаниялар тобының басшысы Николя Маспен кездесу өткізді. Жұмыс сапары аясында өткен кездесуге Франция тарапынан келген делегация мүшелері де қатысты.

Кездесу барысында өңір басшысы Түркістан облысының инвестициялық мүмкіндіктері мен экономикалық әлеуеті туралы кеңінен айтып, шетелдік инвесторлар үшін жасалып жатқан қолайлы жағдайлар жөнінде баяндады. Әсіресе, уран өндіру саласындағы халықаралық серіктестіктің маңыздылығы атап өтілді.

Кездесу аясында Николя Мас Созақ ауданында табиғи уран өндіретін «Қазақстандық-Француздық бірлескен кәсіпорын «КАТКО» ЖШС-ның жаңа басшысы Закариа Эл Марзукиді таныстырды. Нұралхан Көшеров жаңа басшыны құттықтап, Созақ ауданының әлеуметтік-экономикалық дамуына белсенді атсалысуға және өңір тұрғындарына бағытталған жаңа әлеуметтік жобаларды жүзеге асыруға шақырды.

Облыс әкімі 2022 жылдың қаңтарынан бастап KATКO-ны бас директор ретінде басқарған Бастьен Паскальға атқарған еңбегі үшін алғыс айтып, алдағы қызметіне сәттілік тіледі. 2025 жылдың қыркүйегінен бастап Бастьен Паскаль «Orano Canada Inc.» компаниясының бас директоры лауазымын атқарады.