​Жаңбырлы ауа райында макияжды бұзбай сақтаудың жолдары

Сурет: ЖИ

Күз мезгілінде бет макияжы біршама сынақтардан өтеді. Жауын-шашын, жоғары ылғалдылық, ызғарлы жел және үй мен көше арасындағы температура ауытқуы боянған аруларды біраз әлекке салады. Беттің кейбір жерлерінен тон өшіп, көз айналасындағы бояулар ағып, тушь көз астына жағылып, ыңғайсыздық тудыруы мүмкін. Мұндай жағдай орын алмас үшін әдеттегі макияж жасау техникасын сәл өзгертіп, кометика құрамына зейін қойсаңыз жеткілікті.

Тон жағар алдында теріні ылғалдандырыңыз

Макияждың төзімділігі тоналды кремге дейін басталады. Құрғап кеткен теріге декоративті косметика жақсы жағылмай, қабыршақтанған жерлерін анық көрсетіп қояды. Ал тері тым майлы болса, косметика ағып кетуі мүмкін. Сондықтан макияж алдында тері түріне қарамастан, оны міндетті түрде ылғалдандыру керек.

Құрамында майы жоқ (oil-free) жеңіл ылғалдандырғыш крем жағып, сіңуіне уақыт беріңіз. Егер күтім өнімдері бірнешеу болса, оларды кезең-кезеңімен жағыңыз. Әр өнімнің арасында шамамен 30 секунд үзіліс жасасаңыз, сонда теріге тегіс сіңіп үлгереді.

Праймерді ұмытпаңыз

Күтімнен кейін праймерге көшіңіз. Оны бүкіл бетке немесе тек белгілі бір аймақтарға жағуға болады. Құрғақ теріге су негізіндегі, ал майлы теріге силиконды және күңгірттеуші праймерлер қолайлы. Силикон компоненттері теріде жұқа қабықша түзіп, косметиканың тері майымен жанасуын азайтады. Егер қолыңызда праймер болмаса, тоналды кремге дейін Т-аймаққа сәл ғана түссіз пудра жағып алсаңыз болады.

Тоналды кремді жұқа қабатпен жағыңыз

Жаңбырлы ауа райы бетке қабат-қабат макияж жағатын сәт емес. Теріде өнім неғұрлым көп болса, ылғал мен тері майының әсерінен ол соғұрлым тез ағып кетеді.

Күнделікті макияж үшін жеңіл тоналды өнімнің аз ғана мөлшері жеткілікті. Өте жұқа етіп жағыңыз да, тек қажет деп тапқан, дақтар бар жерлерге ғана сәл үстінен қосыңыз.

Жағу әдісі де маңызды. Қалыпты, аралас және майлы теріге қылшық қолайлы. Құрғақ теріге ылғал спонж дұрыс. Ол тонды жұқа етіп тартып, қабыршақтарды білдіртпейді.

Ылғалдылық жоғары кезде тым жарқырайтын хайлайтер текстураларынан абай болған жөн. Ол теріні су сияқты көрсетіп, киімге дақ қалдыруы мүмкін. Егер теріңіз тегіс болса, тоналды кремсіз-ақ, тек көз асты мен мұрын айналасына консилер жағып шектелуге болады.

Крем негізді өнімдерді пудрамен бекітіңіз

Пудра терінің тез жылтырайтын аймақтарына қажет. Т-аймаққа аздап жақсаңыз жеткілікті. Крем негізді румянаны жаққан соң да үстінен пудрамен жеңіл жүріп өткен абзал. Жаңбырлы күнде ылғал мен тері майы крем тәрізді өнімді жылжытып жіберуі мүмкін. Бірақ бүкіл бетке қалың етіп пудра жақпаңыз, бұл макияжды ауырлатып, терінің кедір-бұдырын көрсетіп қояды.

Стрелканы қысқа әрі көпқабатты етіп сызыңыз

Сұйық подводка мен классикалық жұмсақ қарындаш ылғалда тарай бастайды. Сондықтан жаңбырлы күні стрелка сызу техникасын сәл өзгертіңіз. Көздің сыртқы бұрышына қысқа ғана нәзік сызық сызған әлдеқайда сенімді.

1. Қозғалмалы қабаққа аздап праймер немесе мөлдір пудра жағыңыз.

2. Қарындашпен сызық тартып, оның үстінен түсі дәл сондай теньмен бекітіңіз. Құрғақ пигмент кремді негізді ұстап, жағалданып кетуден қорғайды.

Егер стрелка жағылып кетсе, үстінен қайта сызбаңыз. Мицеллярлы суға батырылған мақта таяқшасымен өшіріп, қайтадан сәл пудралап барып сызыңыз.

Тушьтың суға шыдамды түрін таңдаңыз

Сүрме (тушь) — жаңбырда бірінші болып ағатын өнім. Әдеттегі сүрме су тигенде жұмсарып, кірпікті ауырлатады да, көз астында қара дақ қалдырады.

Күз, қыс мезгілдерінде суға төзімді түрін таңдаңыз. Оны бір-ақ қабат етіп жаққан жөн. Көз асты қатты қараймауы үшін кірпіктің сыртқы шеткі бөлігін ғана бояуға болады. Тушьты қосымша бекіту үшін үстінен мөлдір пудрамен жеңіл жүріп өтіңіз.

Қазіргі уақытта суға төзімді тушьтан да мықты термо-тушь (Tubing Mascara) сатылымға шыққан. Термо-тушь кірпікке су тигенде теріге ақпайды, кірпік айналасында арнайы «полимерлі капсула» түзеді. Ол тек жылы сумен (38°C-тан жоғары) жуылады. Жаңбыр астында қалсаңыз да, көз астында «панда» эффектісі атымен болмайды.

Пигменттерді фиксатормен араластырыңыз

Арнайы бекіткіш сұйықтықты (фиксатор) макияж соңында ғана сеппей, косметиканы сұйылту үшін де қолдануға болады. Оның бір-екі тамшысын көзге арналған пигментпен немесе теньмен араластырсаңыз, суға шыдамды әрі қанық подводка жасап алуға болады.

Бекіткіш және орнықтырушы спрейді шатастырмаңыз

Спрей флаконындағы «fixing» және «setting» деген жазулардың айырмашылығы бар.

• Бекіткіш спрей (Fixing) – құрамында полимерлер бар. Шашқан соң теріде жұқа, серпімді пленка түзеді. Ол макияжды берік ұстап, суға төзімділік береді. Оны макияж толық аяқталғанда шашады.
• Орнықтырушы спрей (Setting) – басқа функция атқарады. Оның міндеті макияжды бекіту емес, жағылған барлық қабатты (тон, пудра, румяна) бір-бірімен кірістіріп, табиғи көрсету. Оны макияж жасау барысында, әр қабатты жағу арасында немесе спонжды сәл сулап алу үшін қолдануға болады.

Артық жылтырды күңгірттеуші сулықпен кетіріңіз

Ылғал ауа райында тері майы маңдай, мұрын және иекте анық білінеді. Күңгірттеуші сулық пудраның жаңа қабатын жақпай-ақ, артық майды алуға көмектеседі. Оны бетке жай ғана тигізіп басу керек. Ешқашан ысқыламаңыз, тон қозғалып кетуі мүмкін. Бұл үшін 1-2 салфетка жеткілікті.

Жаңбырлы ауа райы макияжға мұқият қарауды талап етеді. Дұрыс дайындалған тері, жұқа қабаттар, суға төзімді тушь және күндізгі шағын коррекция сіздің бейнеңізді кез келген жауын-шашында мінсіз сақтап қалады!

Дайындаған: Х. ОРАЛ,

ERNUR.KZ

ОҚИ ОТЫРЫҢЫЗ:

Шашқа КЕРАТИНнен келер ПАЙДА бар ма, ҚАУПІ көп пе?