ТАБЫСТЫ СТУДЕНТТІҢ сөресінде болуы керек КІТАПТАР

Қазіргі студент тек маман емес, өз ойын ашық айта алатын, өмірге бейім, рухани және интеллектуалды тұрғыдан жетілген тұлға болуы керек. Университет қабырғасы - білім алумен қатар, өзін-өзі танудың да уақыты. Ал тұлғалық дамудағ көмектесетін ең жақсы тәсілдің бірі - кітап. Жақсы кітап адамды өзгертеді, шабыт береді және болашағына бағыт сілтейді. Төменде студенттерге арналған ең пайдалы алты тұлғалық даму кітабы ұсынылады.

1. Стивен Кови - «Табысты адамдардың 7 дағдысы»

Бұл кітап — өзін-өзі басқарудың энциклопедиясы десе болады. Автор адамның ішкі еркіндігін, мақсат қою қабілетін және өмірге жауапкершілікпен қарауды үйретеді. Кови ұсынған жеті дағды — өмірді жүйелеудің, табысты болудың нақты қадамдары. Мысалы, "алдымен маңызды істерді орындау" немесе "жеңіс-жеңіс қағидасы" сияқты идеялар студентке уақытын жоспарлауға және айналасымен дұрыс қарым-қатынас орнатуға көмектеседі. Бұл кітапты оқу - өзін-өзі басқаруды үйренудің алғашқы қадамы.

2. Джеймс Клир - «Атом әдеттер»

Бұл кітаптың басты қағидасы - «үлкен нәтижелер кішкентай әдеттерден басталады». Автор адам мінез-құлқын өзгертуге арналған ғылыми негізделген тәсілдерді ұсынады. Джеймс Клир жақсы әдетті қалыптастырудың 4 негізгі ережесін түсіндіреді: оны көрінетін, тартымды, жеңіл және қанағаттанарлық ету. Студенттер бұл кітап арқылы оқу, денсаулық, ұйқы немесе тәртіп секілді салаларда тұрақты прогресс жасай алады. Әр тарауда нақты мысалдар келтіріліп, оқырманды әрекет етуге итермелейді.

3. Дейл Карнеги - «Адамдарға әсер ету өнері»

Қарым-қатынас мәдениеті - студенттік өмірдің маңызды бөлігі. Карнеги бұл кітапта адамдармен тіл табысудың, өз пікіріңді мәдени түрде жеткізудің, басқаларды түсінудің қарапайым ережелерін үйретеді. Автордың кеңестері арқылы студент ұялшақтықты жеңіп, топ алдында еркін сөйлеуді, достар табуды және адамдарға жағымды әсер қалдыруды үйренеді. Бұл кітапты оқыған әр адам айналасында жылы атмосфера қалыптастырудың құпиясын түсінеді.

4. Марк Мэнсон - «Бәріне мән бермеудің құпиясы»

Марк Мэнсонның еңбегі - өмірге жеңіл, бірақ саналы қарауға шақыратын кітап. Ол адамдардың барлығына ұнауға тырысу, бәрін бақылауға алу - адамды қажытатынын айтады. Студент үшін бұл кітап - стресс пен уайымнан арылуға, өз шекарасын белгілеуге арналған нағыз көмекші. Автордың шынайы, ирониялы тілі кітапты қызықты әрі ойландырарлық етеді. Оқыған соң өмірдің мәні күресте емес, тепе-теңдікте екенін түсінесіз.

5. Робин Шарма - «Өзінің Ferrari-ін сатқан монах»

Бұл кітап - рухани және кәсіби даму арасындағы тепе-теңдікті табуға арналған рухани нұсқаулық. Автор табыс пен байлыққа жеткен адамның өмірден шынайы бақыт таппай, ішкі үйлесім іздеу жолын баяндайды. Робин Шарма қарапайым өмірдің, медитацияның және өзін тыңдай білудің маңызын айтады. Студенттерге бұл кітап өмірдің материалдық емес, рухани жағына назар аударуға көмектеседі. Әр беті шабытқа толы, ойландырады және өмір салтыңды қайта қарауға жетелейді.

6. Қайрат Жолдыбайұлы - «Кемел адам»

Қазақ оқырманына арналған ерекше туынды - Қайрат Жолдыбайұлының «Кемел адам» кітабы. Автор бұл еңбегінде рухани, моральдық және интеллектуалды жетілудің жолдарын исламдық және ұлттық құндылықтар арқылы түсіндіреді. Кітапта адам бойындағы сабыр, мейірім, еңбекқорлық пен жауапкершілік сияқты қасиеттердің маңызы ашылады. Студенттер үшін бұл еңбек - адамдық болмыс пен рухани кемелдікке жетудің бағыт-бағдары. Қайрат Жолдыбайұлының тілі жеңіл, түсінікті әрі жүрекке жақын. Бұл кітапты оқыған соң адам өзін, өмір мақсатын және қоғам алдындағы орнын тереңірек түсіне бастайды.

Тұлғалық даму - әр студенттің өмір жолындағы ең маңызды кезеңдердің бірі. Бұл процесс үздіксіз еңбекті, ізденісті және рухани байлықты қажет етеді. Ал кітаптар сол жолдағы ең сенімді серік. Жоғарыда аталған еңбектер - тек оқу құралы емес, өмір мектебі. Егер бүгін осы кітаптардың бірін ашсаңыз, ертең өзіңізді жаңа деңгейде табасыз. Себебі тұлға болып қалыптасу — кішкентай қадамнан басталады.