Бұған дейін қала әкімінің тұрғындармен кездесуі мен шаһарды аралауы кезінде көптеген ұсыныстар айтылып келген болса, енді бұл пікірлер арнайы жүйе арқылы қабылданады.
Шымкент қаласында тұрғындардың пікірін тікелей ескеруге бағытталған және қаланың дамуына халықты белсенді тартуды көздейтін жаңа ауқымды жоба іске қосылды. Бұл бастама қала әкімдігі мен халық арасындағы ашық диалогты нығайтуға және өзекті мәселелерді жедел шешуге мүмкіндік береді.
Бұл маңызды жаңалық туралы бүгін Шымкент қаласының Өңірлік коммуникациялар қызметінің ақпарат алаңында өткен брифингте шаһар әкімдігінің ресми өкілі, қала әкімінің орынбасары – Сәрсен Абайұлы Құранбек мәлімдеді.
Жаңа жоба – Қала әкімі Ғабит Сыздықбековтің тікелей бастамасымен қолға алынған «Шымкентті дамытуға халықтың үлесі» деп аталады. Бұл жүйе енді әрбір тұрғынға қаланың дамуына қатысты өз ойы мен ұсынысын оңай әрі жылдам жеткізуге, сондай-ақ қаланы көркейту процесіне белсенді қатысуға мүмкіндік береді.
Бұған дейін тұрғындардың ұсыныстары негізінен қала әкімінің халықпен кездесуі мен шаһарды аралауы кезінде ауызша айтылып келген болатын. Енді бұл пікірлер арнайы цифрлық жүйе арқылы жүйелі түрде қабылданады.
Жобаның ең тиімді жағы – ұсыныстарды жинаудың оңайлатылған форматы. Алдағы уақытта қаланың қоғамдық орындары мен автобустарында арнайы QR-кодтар орнатылатын болады. Тұрғындар өз смартфондары арқылы осы кодтарды сканерлеу арқылы қаланы көркейтуге, инфрақұрылымды жақсартуға және әлеуметтік мәселелерді шешуге арналған идеяларын жылдам әрі ыңғайлы жолдай алады.
Қала әкімі Ғабит Әбдімәжитұлының атап өтуінше, бұл бастама — әрбір азаматқа Шымкенттің дамуына тікелей өз үлесін қосуға және қаладағы оң өзгерістердің бір бөлігі болуға мүмкіндік береді. Әкімдік үшін бұл — халықтың шынайы мұң-мұқтажын және өзекті мәселелерін білудің ең тиімді жолы.
Жүйеге түскен ұсыныстардың барлығын әкімдіктің арнайы құрылған комиссиясы мұқият саралап, талдаудан өткізетін болады. Комиссияның негізгі міндеті – ең өзекті, пайдалы әрі қала бюджеті мен даму жоспарына сәйкес келетін бастамаларды анықтау. Содан кейін таңдап алынған жобалар мен идеялар нақты жүзеге асырылмақ.
Бұл жоба – әкімдік пен халық арасындағы ашық диалогты нығайтуға, сондай-ақ ортақ күш біріктіре отырып, Шымкент қаласының өркендеуіне үлес қосуға бағытталған маңызды әрі стратегиялық қадам болып табылады. Қала билігі тұрғындардың бұл бастамаға белсенді қатысуы қаланың әрі қарайғы дамуына негіз болатынына сенімді.
