Шымкентте жеңіл өнеркәсіп салалық альянсы құрылды

15.01.2026 17:40

Дуальды оқыту жүйесін дамыту, өндірістік практиканың сапасын арттыру және білім беру бағдарламаларын еңбек нарығының нақты сұранысына бейімдеу мәселелері талқыланды.

Шымкент қаласының кәсіпкерлер палатасында жеңіл өнеркәсіп саласында кадр даярлау жүйесін дамытуға арналған кеңейтілген басқосу өтті.

Жиынға Кәсіпкерлер палатасының, қаладағы жоғары оқу орындарының мамандары, техникалық және кәсіптік білім беру ұйымдарының өкілдері мен жеңіл өнеркәсіп саласындағы кәсіпкерлер, ташкенттік мамандар онлайн қатысты.

Кездесу барысында дуальды оқыту жүйесін дамыту, өндірістік практиканың сапасын арттыру және білім беру бағдарламаларын еңбек нарығының нақты сұранысына бейімдеу мәселелері талқыланды.

«Қазіргі таңда еліміздің барлық өңірінде түрлі салалық альянстар құру жұмыстары жүргізілуде. Мұндағы мақсат – техникалық және кәсіптік білім беру орындарының мамандар даярлау әлеуетін дамыту, білім беру орындары мен өндіріс арасындағы байланысты нығайтудың жаңа қадамы, нарыққа бәсекеге қабілетті маман даярлау. Сонымен қатар кәсіпорындармен бірлесе отырып дуальды оқыту жүйесін дамыту да маңызды болып отыр», – деді Шымкент қалалық кәсіпкерлер палатасының бөлім басшысы Жанар Алтаева.

Ташкент текстиль және жеңіл өнеркәсіп институтының доценті, техникалық ғылымдардың докторы Малахат Илхамова Өзбекстандағы тәжірибе және шешілуі тиіс проблемаларды бөлісті.

Жиын барысында, сондай-ақ, кәсіпорындардың өтінімдері негізінде кадр даярлау және түлектерді жұмысқа орналастыру тетіктері қарастырылды. Студенттік стартаптар мен бизнес-жобаларды қолдау, кәсіпкерлік құзыреттерді дамыту бағыттары талқыланды.

«Бұл – жеңіл өнеркәсіп саласындағы өзекті мәселенің бірі. Себебі, мамандар оқу орнын тәмамдап шыққан соң барлығы бірдей жұмыс таба бермейді. Оның бір себебі – жас мамандарда жеткілікті тәжірибенің болмауы. Сол үшін болашақ мамандардың бойында өндіріске қажет нақты біліктілік, машық болуы керек. Сондықтан, жуырда қала әкімімен өткен кездесуде өндірістік парктер ашылса деген өтінішімізбі білдірдік, сонда студенттер немесе осы салада жұмыс істегісі келетін кез келген адам келіп, парктерде тәжірибеден өтер еді, құрылғыларда жұмыс істеп, біліктілік арттыруға мүмкіндік алар еді. Осындай нәтижеге қол жеткізу үшін саладағы барлық тарап күш біріктіруіміз қажет. Сондықтан, салалық альянс құру маңызды деп санаймын», – деді Шымкент қалалық креактивті индустрия қауымдастығының төрайымы Жанна Елтанова.

Жиын қорытындысы бойынша жеңіл өнеркәсіп салалық альянс құрылып, Кәсіпкерлер палатасы, оқу орындары және кәсіпорындар арасында үшжақты ынтымақтастық меморандумына қол қойылды. Ортақ келісімге сәйкес, 2025-2027 жылдарға арналған Жол картасы іске асырылады.

Бұл бастама Шымкент қаласының экономикалық дамуына және жеңіл өнеркәсіп саласындағы кадрлардың біліктілігін арттыруға ықпал етеді деп күтілуде. Кәсіпкерлер палатасы, жоғары оқу орындары және кәсіпорындар арасындағы тығыз ынтымақтастық еңбек нарығындағы талаптарға сай білікті мамандар дайындауға бағытталған.