ШЫМКЕНТ: құтыруға қарсы екпе тегін жүргізіледі

0
87

Аурудың алдын алу мақсатында тұрғындар жеке бас гигиенасын қатаң сақтап, арнайы қорғаныш киім киюі қажет.


ШЫМКЕНТ: құтыруға қарсы екпе тегін жүргізіледі

2025 жылы Шымкентте жануарлардан жарақат алған 1294 адам медициналық көмекке жүгінген. Бұл өткен жылмен салыстырғанда 31 жағдайға көп.

Қалада иесіз ит-мысықтарды аулау жұмыстары жалғасуда — биыл 20127 ит пен 64 мысық залалсыздандырылған.

Бұл туралы бүгін Шымкент қаласы бойынша санитарлық-эпидемиологиялық бақылау департаменті басшысының орынбасары – Тұрымбетова Айгүл Мелесқызы мәлімдеді.

Құтыру – жануардан адамға жұғатын және орталық нерв жүйесін зақымдайтын аса қауіпті жұқпалы ауру. Құтыруға шалдыққан жағдайда аурудың соңы өлімге әкеледі. Аурудың қоздырғышы ит, қасқыр, түлкі, қарсақ сияқты аңдар арқылы таралады.

Құтырудан сақтанудың ең тиімді жолы — антирабикалық вакцина. Қала тұрғындарына құтыруға қарсы екпе тегін жүргізіледі. Әл-Фараби ауданына қарасты №2 қалалық аурухана (Жандосова көшесі №92 үй) жануар тістеген немесе жарақаттаған жағдайда алғашқы медициналық және вакцина көмегін көрсетеді.

Мамандар күдікті жануарлардан балаларды аулақ ұстауға, ит-мысықты мал дәрігеріне тексертіп, дер кезінде вакцинациялауға шақырады. Жарақат алған жағдайда жараны сабынды сумен жуып, антисептикпен өңдеп, дереу дәрігерге қаралу керек.

Сонымен қатар, Шымкентте бруцеллез ауруының 7 жағдайы тіркелген. Мамандардың мәліметінше, аурушаңдықтың себептерінің бірі – қала маңындағы ауыл шаруашылық малдары арасында бруцеллездің таралуы. Бруцеллез – адамға малдан жұғатын аса қауіпті жұқпалы ауру. Ауру созылмалы түрде өтіп, бірнеше рет қозуы мүмкін.

Аурудың алдын алу мақсатында тұрғындар жеке бас гигиенасын қатаң сақтап, арнайы қорғаныш киім киюі қажет. Ет пен сүт өнімдерін тек қайнатып немесе пісіріп тұтыну керек. Қол жарақаттарын таңып, жұмыс соңында міндетті түрде қолды жуу — ауруды жұқтырудан қорғайтын қарапайым әрі тиімді амалдар. Үйдегі малдарды ветеринар маманға тұрақты түрде тексертіп, ауру анықталған жағдайда оқшаулап жою керек.
Қала аумағында сібір жарасы бойынша 8 стационарлық қолайсыз бекет арнайы бетон қоршаумен белгіленген. Бұл орындарда кезінде ауру малдар сойылған. Сонымен қатар, малқорымдардың айналасында 1000 метр радиуста шаруашылық жұмыстары мен мал бағуға тыйым салынған. Бұл талаптар аурудың таралуын болдырмауға бағытталған.
Бөлісу