Шымкент қаласында өзендердің экологиялық жағдайы мамандардың ерекше бақылауында. Экология департаментінің зертханалық-талдамалы бақылау бөлімі жыл бойы қаладағы су, ауа және топырақ сапасына мониторинг жүргізіп келеді.
Бұл туралы бүгін Шымкент қаласының Өңірлік коммуникациялар қызметі ақпарат алаңында өткен брифингте, Шымкент қаласы бойынша экология департаментінің басшысы – Қозыбаев Ермахан Тастанбекұлы тарқатып айтып берді.
2025 жылы департамент зертханасының мамандары 82 нысанға шығып, 242 хаттама толтырған. Оның ішінде шағымдар негізінде жүргізілген жоспардан тыс тексерулер кезінде 182 хаттама, ал жоспарлы мониторинг барысында 60 хаттама рәсімделген. Жалпы саны 2 277 сынама алынып, 12 478 зертханалық талдау жүргізілген.
Соның ішінде атмосфералық ауа бойынша 2 038 сынама алынып, 9 244 талдау жасалған. Су объектілерінен 188 сынама алынып, 2 839 талдау жүргізілген. Ал топырақтан алынған 51 сынама бойынша 395 зертханалық зерттеу жасалған.
Экология департаментінің зертханасы Шымкент қаласы арқылы өтетін Қошқар-Ата, Қарасу, Бадам және Сайрамсу өзендеріне, сондай-ақ Қосдиірмен, Тоғыс, Текесу, Шымкент және БМК каналдарына жылына екі рет мониторингтік зерттеу жүргізеді. 2025 жылы су объектілері бойынша 156 сынама алынып, 2 364 талдау жүргізілген.
Экология департаментінің мәліметінше, 2026 жылы қаладағы өзендер мен атмосфералық ауа сапасына мониторингті кеңейту, заңсыз қоқыс орындарын анықтау бойынша рейдтерді жалғастыру және пайдалы қазбаларды заңсыз өндіру фактілерін анықтау бағытындағы жұмыстар күшейтіледі.
![](/assets/thumbnails/d2/d2f8cac60a89479c814a149f91a8b04e.jpg ""Дәрменсіз күйге түскеніне әкемізді кінәлайды"")
