Конституцияның жаңа редакциясында азаматтардың құқықтары мен бостандықтарын қорғау тетіктері күшейтіліп, заң үстемдігі қағидатына ерекше мән берілгенін атап өтті.
Денсаулық сақтау саласы – қоғамның әлеуметтік тұрақтылығы мен ұлт болашағын айқындайтын стратегиялық бағыттардың бірі. Адам өмірі мен денсаулығы үшін аянбай еңбек етіп жүрген медицина қызметкерлері ел өміріндегі маңызды өзгерістерге бейжай қарамай, қоғамдық бастамаларға белсенді түрде қатысып келеді.
Осы тұрғыда Конституцияның жаңартылған мазмұнын түсіндіру мақсатында арнайы кездесу ұйымдастырылды.
Жиын Қалалық балалар клиникалық ауруханасы ұжымының қатысуымен өтті. Кездесу барысында елдегі конституциялық реформалардың негізгі бағыттары мен олардың қоғам дамуына ықпалы кеңінен талқыланды.
Басқосуда сөз сөйлеген заң ғылымдарының кандидаты Ботабек Имашев тұрақтылық кез келген мемлекеттің өркендеуінің басты шарты екенін атап өтті. Оның айтуынша, тәуелсіздіктің алғашқы кезеңінде қабылданған қолданыстағы Конституция мемлекеттілікті қалыптастыруда тарихи миссиясын абыроймен атқарды. Алайда жаһандық геосаяси ахуалдың өзгеруі, ғылым мен технологияның қарқынды дамуы және қоғамдық сұраныстың артуы құқықтық жүйені заман талабына сай жетілдіруді қажет етеді.
– Жаңа Конституция адам құқықтары мен заң үстемдігін басты құндылық ретінде айқындайды. Бұл – білім мен ғылымға негізделген, әділетті әрі өркениетті мемлекет құруға бағытталған нақты қадам, – деді Ботабек Есенбекұлы.
Жиын барысында аурухананың пульмонология бөлімінің меңгерушісі Гүлжанат Наурызова мен қабылдау бөлімінің меңгерушісі Өркен Ақбаев та пікір білдірді. Олар Конституцияның жаңа редакциясында азаматтардың құқықтары мен бостандықтарын қорғау тетіктері күшейтіліп, заң үстемдігі қағидатына ерекше мән берілгенін атап өтті. Сонымен қатар енгізілген өзгерістер қоғам мен билік арасындағы сенімді арттырып, мемлекеттік басқару жүйесінің тиімділігін нығайтуға ықпал ететінін жеткізді.
Кездесу ашық форматта өтіп, медицина қызметкерлері өздерін толғандырған сауалдарын қойып, жан-жақты жауап алды. Жиын қортыныдысы бойынша қатысушылар жаңа Конституцияға қолдау білдірді.
