Тұтынушылардың құқықтарын қорғау қағидаттарының бірі тұтынушылардың экономикалық мүдделеріне жәрдемдесу және олардың құқықтарын қорғау болып табылады.
ERNUR.KZ. 10 айдың қорытындысы бойынша қабылданған шаралар нәтижесінде ағымдағы жылы тұтынушылардың құқықтары жалпы сомасы 2,2 млрд теңгеге қорғалды. Халықтың құқықтық сауаттылығын арттыру және ақпараттандыру мақсатында неғұрлым резонансты істерді жариялау және есепке алу жүзеге асырылады. ҚР Сауда және интеграция министрлігі Тұтынушылардың құқығын қорғау комитетінің төрағасы Болат Таңабергенов ОКҚ алаңында өткен баспасөз мәслихатында атқарылған жұмысқа қатысты мысалдар келтірді.
«51 автокөлік тұтынушысының 810 млн теңге сомасына оларға тиісті емес тауарды сату бойынша құқықтары қорғалды.Үлескерлер мен үй сатып алушылардың 258 млн теңгеге құқықтары қорғалды. Сондай-ақ ағымдағы жылы ТКШ сегментінде 31 млн теңге сомасына 101 тұтынушыны қорғауға қатысты 9 резонанстық іс бойынша тұтынушылардың құқықтары қорғалды. Сонымен қатар Министрлік тұтынушылық көңіл-күйдің динамикасын үнемі социологиялық сауалнамалар арқылы қадағалап отырады. Тұтынушыларды алаңдататын мәселелер жалпы алғанда жыл сайын қайталанады», – деді спикер.
Осы проблемалардың шешімі ретінде адам өмірінің барлық саласында тұтынушылардың құқықтарын кешенді қорғау үшін «Тұтынушылардың құқықтарын қорғау туралы» Заңның базалық қағидаттарын тарату қажеттілігі бар. Сауалнама нәтижелері анықталған кемшіліктерді қабылдау және жою үшін тиісті салалық мемлекеттік органдарға жіберіледі, БАҚ-та және Министрліктің сайтында жарияланады, сондай-ақ Үкіметке жолданатын «Тұтынушылардың құқықтарын қорғау мәселелері бойынша жүргізілетін жұмыстың нәтижелері туралы» жыл сайынғы баяндамада көрсетіледі.
Сондай-ақ сауалнама қорытындылары ВАК-тың (ведомствоаралық кеңес) жыл сайынғы отырыстарында талқыланады, оның нәтижелері бойынша салалық мемлекеттік органдарға тұтынушылардың құқықтарын бұзу мәселелері бойынша тиісті ден қою шараларын қабылдау ұсынылады. Осылайша, осы жылдың 31 шілдесінде ВАК-тың отырысында көлік, медициналық, туристік қызметтер көрсету және электрондық сауда салаларындағы тұтынушылардың құқықтарын қорғау мәселелері талқыланды.
Айта кетерлігі, қазір Парламент Мәжілісінде «Тұтынушылардың құқықтарын қорғау туралы» Заң жобасы жаңа редакцияда қаралуда. Құжат азаматтардың келіп түскен өтініштерін талдау және мониторингтеу нәтижелерін, қоғамдық институттардың пікірлері мен ұсыныстарын және әлеуметтанулық зерттеудің негативті көрсеткіштерін ескере отырып әзірленді. Заң жобасы тұтынушылардың құқықтарын сапалы қорғауды қамтамасыз етуге, қоғамның өмір сүру сапасын арттыруға, тұтынушылардың құқықтарын қорғау мәселелерінде үкіметтік емес институттардың рөлін күшейтуге бағытталған.
