Қазақстандық оқушыларды амандасуға үйретеді: арнайы жұмыс тобы құрылды

0
334

Бұған дейін Құрылтай депутаты Ерлан Сайыр амандасу мәдениетін қазақстандық мектептердің күнделікті өмірінің бір бөлігіне айналдыруды ұсынған болатын.


Қазақстандық оқушыларды амандасуға үйретеді: арнайы жұмыс тобы құрылды

ERNUR.KZ. Қазақстанда оқушыларға арналған амандасу ережелерін әзірлеуге Ыбырай Алтынсарин атындағы Ұлттық білім академиясы тартылды. Мамандар қазірдің өзінде әдістемелік ұсынымдар бойынша жұмыс істеп жатыр, деп жазады tengrinews.kz.

Бұл туралы Оқу-ағарту министрлігінің Құрылтай депутаты Ерлан Сайыртың сауалына берген жауабында айтылған.

Ведомствоның мәліметінше, Ыбырай Алтынсарин атындағы Ұлттық білім академиясы арнайы жұмыс тобын құрған. Оның құрамына ғалымдар, сарапшылар және азаматтық қоғам өкілдері кірді.

Олардың міндеті - оқушылардың бойында амандасу мәдениетін қалыптастыруға көмектесетін әдістемелік ұсынымдар әзірлеу.

"Білім алушылардың сәлемдесу мәдениеті бойынша әдістемелік ұсынымдар әзірленіп жатыр", - делінген министрлік жауабында.

Оқу-ағарту министрлігі ұсынымдарды әзірлеу кезінде педагогтердің, білім беру процесінің басқа да қатысушыларының, мүдделі тараптар мен мемлекеттік органдардың ұсыныстары ескерілетінін атап өтті. Дайындалып жатқан ұсынымдар депутаттармен қосымша талқыланатын болады.

Ведомство сәлемдесу мәдениеті ұлттық дәстүрлерді сақтау, үлкенге құрмет, кішіге ізет көрсету және өзара сыпайылықты тәрбиелеу үшін маңызды деп санайды.

Сонымен қатар ұсынымдардың нақты қашан дайын болатыны және олардың мектептер үшін міндетті болатыны-болмайтыны жауапта нақтыланбаған.

Неге оқушыларды сәлемдесуге үйрету туралы шешім қабылданды?

Бұған дейін Құрылтай депутаты Ерлан Сайыр амандасу мәдениетін қазақстандық мектептердің күнделікті өмірінің бір бөлігіне айналдыруды ұсынған болатын.

Оның пікірінше, ілтипатпен сәлемдесу жекелеген тәрбиелік іс-шаралармен шектелмей, балалардың әдетіне айналуы тиіс.

Депутат арнайы ұсынымдар әзірлеуді, сондай-ақ амандасу мәдениетін сынып сағаттары, мектеп ережелері, тәлімгерлік, ата-аналармен жұмыс және мұғалімдердің жеке үлгісі арқылы бекітуді ұсынды.

Сайыр дәстүрлі қазақша сәлемдесудің басты ерекшеліктерінің бірі ұстамдылық екенін атап өтті.

Бұған дейін Президент Қасым-Жомарт Тоқаев та ұлттық амандасу дәстүрлерін сақтау қажеттігі туралы айтқан болатын. Атап айтқанда, Мемлекет басшысы кездескенде құшақтасып, сүйісу әдетінен бас тартуға шақырып, ер адамдар үшін нық қол алысудың жеткілікті екенін атап өткен еді.