«Табаны сынған»: Өскеменде өрт сөндіруші биік ғимараттан құлап кетті (ВИДЕО)

ERNUR.KZ. Бүгін әлеуметтік желіде өрт сөндіріп жатқан қызметкердің терезеге кіре бергенде құлап түскен сәтінің қорқынышты видеосы тарап жатыр, деп жазады azattyq-ruhy.kz.

Анықталғандай, оқиға Шығыс Қазақстан облысының Өскемен қаласында 5 мамырда болған. Красин көшесіндегі тұрғын үйдің төртінші қабатында өрт шыққан. Өрт кезінде пәтер тұрғындары үйде болмаған. Құтқару жұмыстары барысында №7 өрт сөндіру бөлімінің қызметкері биіктен құлап, жарақат алды.

«ТЖМ қауіп-қатер медицинасы орталығының мамандары алғашқы медициналық көмек көрсетті. Дәрігерлер оған «оң аяғының табаны сынған» деген диагноз қойған. Қазір оның жағдайы қанағаттанарлық, өміріне қауіп төніп тұрған жоқ. Қызметтік тексеру жүріп жатыр», - деп хабарлады ТЖМ.

Дереккөз өртеніп жатқан үйдің терезе жағында ағаш көп болған соң, арнайы техника бара алмағанын, сондықтан, өрт сөндіруші терезеге саты арқылы шыққанын айтып отыр.