Шығыс Қазақстанда 26 ауыл халқы ішімдіктен бас тартты

05.04.2026 16:23

162

Өңірде құқық бұзушылықтың алдын алуға және салауатты өмір салтын қалыптастыруға бағытталған «Ішімдіксіз ауыл» бастамасы жалғасып жатыр.

Фото: ШҚО ПД

ERNUR.KZ. Шығыс Қазақстан облысында ішімдіктен бас тартқан ауылдар саны 26-ға жетті, деп жазады inform.kz.

Бұл бастамаға Тарбағатай ауданындағы Маңырақ ауылдық округіне қарасты Бозша ауылының тұрғындары да қосылды. Осылайша, облыс бойынша алкогольді өнімдерді сатудан толықтай бас тартқан елді мекен саны 26-ға жетті.

– Жергілікті жастар ауыл ақсақалдарына осындай ұсыныс тастады. Бұл шешімді ауыл тұрғындары бірауыздан қолдаған, - деп хабарлады ШҚО Полиция департаментінің баспасөз қызметінен.

Қазір Бозша ауылында 60-қа жуық үйде 154 адам тұрады.

Мамандардың айтуынша, ішімдік сатуға шектеу қойылған елді мекендерде құқық бұзушылық деңгейі, соның ішінде мас күйінде жасалатын қылмыстар азайған. Сондай-ақ отбасылық-тұрмыстық жанжалдар мен ұсақ бұзақылық фактілерінің де төмендегені байқалып отыр.