Салық кодексі президенттің қарауына жіберілді

Кодекс аясында корпоративті табыс салығына қатысты маңызды өзгерістер бар. Олар:

корпоративті табыс салығының базалық мөлшерлемесі - 20%, банктер мен ойын бизнесі үшін - 25%;

әлеуметтік сала үшін (білім, медицина) КТС мөлшерлемесі кезең-кезеңімен: 2026 жылдан бастап 5%, 2027 жылдан бастап 10%-ке дейін көтеріледі;

ауыл шаруашылығы тауарын өндірушілер үшін мөлшерлеме 3% деңгейінде қалады;

Жеке табыс салығының прогрессивті мөлшерлемесі бойынша жылдық табысы 8 500 АЕК-тен асатын жеке тұлғалар үшін 15%-дық жоғарылатылған мөлшерлеме белгіленеді;

“Сән-салтанат” заттарына салық салу тәртібі бойынша құны 75 млн. теңгеден асатын жеңіл автомобильдер, құны 100 млн. теңгеден асатын ұшақтар мен яхталар бойынша құнының 10%-мөлшерінде акциз енгізіледі;

Бұдан бөлек, арнайы салық режимдері қысқартылады. Үшеуі ғана қалады. Олар:

өзін-өзі жұмыспен қамтығандар үшін мөлшерлеме - 4%, шекті табыс – жылына 15 млн. теңгеге дейін, жеке кәсіпкер ретінде тіркелудің қажеті жоқ;

Жеңілдетілген декларация негізінде кіріс лимиті – 600 мың АЕК (жылына 2,36 млрд.теңге), жұмыскерлердің санына шектеу қойылмайды, мөлшерлеме - 4%, ал мәслихаттар мөлшерлемені 50%-ға төмендете алады немесе ұлғайта алады (2% пен 6% аралығында);

шаруа және фермер қожалықтары үшін режим сақталады, бірақ бірыңғай жер салығының орнына жеке табыс салығы енгізіледі;

Салық кодексі аясында жеке тұлғаларды активтері мен міндеттемелері туралы декларацияларды тапсырудан босату ұснылып отыр. Ал Қазақстанда және одан тысқары жерлерде құны 20 000 АЕК-тен асатын мүлікті сатып алу кезінде кіріс көздерін көрсетіп, декларациялау міндеті белгіленеді.

Бұдан бөлек, 230 000 АЕК-ке дейінгі дивидендтер түріндегі кірістер үшін – 5%, ал осы шектен жоғары сомаға 15% мөлшерінде белгіленеді.

Айта кетері, жаңа Салық кодексінің нормалары 2026 жылдың 1 қаңтарынан бастап енгізіледі.