Бұдан былай азаматтарымыз шетелден 5 жылдан асқан көлікті әкеле алмайды.
Фото: Евгений Епанчинцев/РИА Новости
ERNUR.KZ. 26 қыркүйектен бастап көлік құралдарының электрондық паспортын рәсімдеу тәртібі өзгерді, деп жазады inbusiness.kz.
Енді зертханалар жеке тұлғалардан 5 жылдан аспаған және жеке пайдалануға әкелінген көліктердің ғана құжаттарын қабылдайды. Жеке тұлға жылына бір ғана көлік әкелуге құқылы. Салмағы 3,5 тоннаға дейінгі тіркемені немесе автоүйді қосымша әкелуге рұқсат.
– Екінші нарықтағы көлікті сырттан әкелген кезде оның ұрланған/ұрланбағанын да тексеріп алу қажет. Осындай қызмет түрлерін кейбір банктер мен маркетплейстер ұсына алады. Еуразиялық экономикалық одақ елдерінен бес жылдан асқан автокөліктер әкелінген жағдайда, электрондық паспортқа "аяқталмаған" деген мәртебе беріледі. Мұндай көлікті Қазақстанда алғаш рет есепке қою мүмкін болмайды, – деп мәлімдеді автонарықты мониторингтеу және талдау агенттігінің бас директоры Артур Мискарян.
Көлікті жеке пайдалану мақсатында рәсімдеген жағдайда кедендік төлем төленеді. Мөлшері есептеу тәсіліне қарай көлік құнының 48 пайызын құрайды немесе қозғалтқыштың әр текше сантиметрі үшін 1,5 еуроға тең.
Заңды тұлғалар үшін автокөлік типін мақұлдау құжаты бойынша рәсімделіп, кедендік баж мөлшерлемесі 15 пайыз болады.
