Қазіргі таңда егер электронды тапсырыс 200 еуродан асса, 15% мөлшерінде баж салынады, ал жаңа нормаға сәкес бұл салық 5% болып белгіленеді.
Sputnik / Владислав Воднев
ERNUR.KZ. Биыл 12 қыркүйекте өтетін Еуразиялық экономикалық комиссия (ЕЭК) кеңесінің отырысында трансшекаралық электронды сауданы (маркетплейстер арқылы онлайн тапсырыстарды) реттеу мәселесі қаралады, деп жазады sputnik.kz.
Интернет арқылы шетелден тауар сатып алатын жеке тұлғалар үшін жаңа ереже енгізілмек, бұл бұрын заң жүзінде нақты реттелмеген еді.
Ұсынылған нормаларға сәйкес:
Кедендік баж салығынсыз жеткізу шегі – 200 еуро
Егер тапсырыс 200 еуродан асса – 5% мөлшерінде баж салығы салынады, бірақ ең кемі 1 еуро/кг.
Қашан күшіне енеді?
Бұл ережелер ресми жарияланған күннен кейін 10 күннен соң күшіне енеді, бірақ алдымен ЕАЭО Кеден кодексіне енгізілетін өзгерістер одаққа мүше елдерде ратификациялануға тиіс.
Қазіргі таңда 200 еуроға дейін баж төленбейді. 200 еуродан асса, 15% баж салығы қолданылады.
Жаңа ережеде:
Шегі 200 еуро деңгейінде сақталады.
Бірақ баж салығы азаяды – 5% ғана.
Ескерту: жаңа норма маркетплейстер арқылы сатып алынатын тауарларға қатысты. Яғни, мұның жеке тұлғалар арасында пошта арқылы жөнелтілетін тауарларға қатысы жоқ.
Соңғы шешімді ЕАЭО елдерінің вице-премьерлері консенсус арқылы қабылдайды. Кейін бұл нормалар Кеден кодексіне өзгерістер ретінде барлық елдерде мақұлдануы қажет.
