Президент шілде айында Астанада Аlemcloud ұлттық суперкомпьютерін ресми түрде іске қосты.
Фото: Ақорда
ERNUR.KZ. Қазақстан Жасанды интеллект саласындағы қоғамдық қатынастарды реттеуге заң жүзінде негіз қалаған әлемдегі алғашқы елдердің қатарына енді. Бұл туралы ҚР Президентінің көмекшісі — Баспасөз хатшысы Руслан Желдібай хабарлады, деп жазады inform.kz.
Руслан Желдібайдың айтуынша, Президент биылғы Жолдауында Қазақстанды алдағы үш жылдың ішінде толық цифрлық мемлекетке айналдыру жөнінде стратегиялық міндет қойған еді.
— Еліміздің цифрлық экожүйесін қалыптастыру аясында Президент тапсырмасымен қыруар шаруа атқарылды. «Жасанды интеллект туралы» Заңның қабылдануы — аталған саладағы жаңалықтың бірі. Осылайша, Қазақстан ЖИ саласындағы қоғамдық қатынастарды реттеуге заң жүзінде негіз қалаған әлемдегі алғашқы елдердің қатарына енді. Аталған саладағы мемлекеттік саясатты үйлестіру мақсатында Жасанды интеллект және цифрлық даму министрлігі құрылды, — деп жазды ҚР Президентінің көмекшісі — Баспасөз хатшысы.
Президент шілде айында Астанада Аlemcloud ұлттық суперкомпьютерін ресми түрде іске қосты. Қараша айындағы тестілеу нәтижесінде аталған жүйе суперкомпьютерлердің әлемдік TOP-500 рейтингінде 86-орынға ие болды. «Қазақтелеком» АҚ Алматыға екінші Al‑Farabium суперкомпьютерін жеткізді. Ол жаһандық рейтингте 103-орынға табан тіреді.
— Президент, ең алдымен, білікті мамандар даярлауға баса мән беру қажет деп санайды. Сондықтан елімізде ЖИ саласындағы арнаулы зерттеу университетін құруды ұсынды. Астанада Alemai халықаралық жасанды интеллект орталығы ашылды. Студенттерге арналған AI-Sana бағдарламасы басталды. Сол арқылы қазірдің өзінде 440 мыңнан астам студент ЖИ саласын меңгерді. Жасанды интеллект саласындағы алғашқы қазақстандық «сыңармүйіз» стартап — Higgsfield AI пайда болды. Бұл да айтулы уақиға, — деп атап өтті Желдібай.
Осыдан бұрын биыл аграрлық саладағы негізгі капиталға құйылған инвестиция 790 млрд теңгеге жеткенін жазған едік.
Сонымен қоса елімізде жаңа бағыттар ашылып, халықаралық әуе рейстері көбейгені анықталды.
