Енді үй жануарының паспортын eGov Mobile арқылы көруге болады

21.05.2025 09:25

124

2025 жылғы наурыз айындағы жағдай бойынша жүйеде 224 мыңнан астам үй жануары тіркелген, оның ішінде 20 мыңнан астамы – үйсіз жануарлар.

фото: Sputnik / Владислав Воднев

ERNUR.KZ. Енді үй жануарларының цифрлық паспортын eGov Mobile қосымшасы арқылы көруге болады, деп жазады sputnik.kz.

"Мысық, ит және басқа да үй жануарларының иелері олардың мәліметтерін eGov Mobile мобилді қосымшасының "Цифрлық құжаттар" бөлімінен қарай алады", - деп жазылған хабарламада.

Барлық мәлімет TABAN – үй жануарларын есепке алу Бірыңғай деректер базасынан жүктеледі. Бұл жүйеде тіркелген барлық жануарға қатысты маңызды оқиғалар жазылып отырады.

Цифрлық паспортта мына мәліметтер қамтылады:

жануардың жеке нөмірі,

құжат нөмірі,

аты,

түсі,

тұқымы,

туған күні,

ерекше белгілері,

жануардың түрі мен жынысы,

тіркелген мекенжайы,

нақты тұратын мекенжайы,

иесінің толық аты-жөні мен ЖСН.

Сондай-ақ чиптеу, стерилизация және вакцинация туралы ақпарат – даталары мен мәртебелері көрсетілген.

Қызметті пайдалану үшін:

eGov Mobile қосымшасына авторизациядан өтіп;

"Цифрлық құжаттар" сервисіне кіру қажет;

"Басқа құжаттар" бөлімінде Жануар паспортымен танысу керек;

егер құжат көрінбесе, "Құжаттарды жаңарту" батырмасын басу қажет.

Цифрлық төлқұжат ветеринарлық клиникаға барғанда, саяхатқа шығарда, көрмелерге қатысқанда немесе жануар жоғалған жағдайда оның деректерін жедел ұсынуға мүмкіндік береді. Сонымен қатар бұл қызмет үй жануарларын жүйелі түрде есепке алуға, қаңғыбас жануарлар санын азайтуға және иелерінің жауапкершілігін арттыруға септігін тигізеді.