Астанада құрылысы бітпеген тұрғын үй кешені су астында қалды - министрлік түсініктеме берді

Журналистер құрылысы аяқталмаған тұрғын үй кешенінің ендігі жағдайы қандай болмақ екенін сұрады. Айта кетсек, аталған нысанда су жиналып, екінші қабатқа дейін жеткен.

"Бұл нысанның құрылысшысы – BBC Gold компаниясы. Құрылыс жұмыстары тоқтатылған. Қазіргі таңда құқық қорғау органдары тарапынан қылмыстық іс қозғалды. Үлескерлер өз тараптарынан тұтыну кооперативін (ЖСК) құрған. Қазір осы нысанды зардап шеккен үлескерлердің меншігіне беру мәселесі қарастырылуда. Бұл жағдай бізге жақсы таныс. Еліміз бойынша 42 проблемалық құрылыс нысаны бар, олардың әрқайсысы біздің бақылауымызда. Мұндай мәселелер орын алған жағдайда, барлығын құқық қорғау органдарымен бірлесе отырып шешетін боламыз", – деді Ерсайын Нағаспаев.

Сондай-ақ, БАҚ өкілдері Астанада және еліміздің өзге қалаларында салынып жатқан тұрғын үй кешендеріне жаппай аудит немесе тексеріс жүргізіле ме деген сұрақ қойды.

"Әрбір тұрғын үй нысаны жеке бақылауда. Біздің жүйеде бейберекетсіздікке орын жоқ. Егер құрылыс жүргізуге лицензия берілсе, бұл компанияның тиісті процедуралардан өткенін білдіреді. Егер тұрғын үй кешені құрылысының өрескел бұзушылықтармен салынып жатқаны дәлелденсе, міндетті түрде тиісті шаралар қолданамыз", – деп толықтырды министр Ерсайын Нағаспаев.

Бұған дейін тозығы жеткен инженерлік желілердің көп бөлігі қай аймақтарда орналасқанын жазған болатынбыз.