Ақмола облысында туберкулез өршіп тұр: 4 адам көз жұмды

ERNUR.KZ. Ақмола облысында туберкулез дерті өршіп тұр. Соңғы бес айдың ішінде өңірде 111 адам өкпе құртына шалдыққан. Өкінішке қарай, ауруы асқынған төрт адам көз жұмды. Олардың екеуі – Ақкөл мен Сандықтау аудандарынан, қалған екеуі – Көкшетау қаласының тұрғындары, деп жазады azattyq-ruhy.kz.

Қауіпті дерт қай өңірлерде жиі кездеседі?

Мамандардың айтуынша, туберкулез ауруы әсіресе мына аудандарда жиі тіркеліп отыр:

• Ақкөл;
• Бұланды;
• Бурабай;
• Біржан сал;
• Ерейментау;
• Есіл;
• Жақсы.

Бұл өңірлерде жұқпалы дертке шалдығу деңгейі алаңдатарлық күйде.

Аурудың көбею себебі – немқұрайлылық

Ақмола облысының санитариялық-эпидемиологиялық бақылау департаментінің бас маманы Жанаргүл Есімжанованың айтуынша, туберкулездің таралуына ең басты себеп – тұрғындардың өз денсаулығына салғырт қарауы.

«Адамдар медициналық көмекті уақытында іздемейді. Флюорографиядан дер кезінде өтпейді. Сондай-ақ төмен күнкөріс деңгейі, басқа аурулардың қатар жүруі де туберкулездің жұғуына себеп болады», – дейді маман.

Мамандар не ұсынады?

Дәрігерлер жыл сайын профилактикалық шаралар жүргізіп, тұрғындарды салауатты өмір салтына көшуге шақырып келеді. Уақытында флюорографиялық тексеруден өту, иммунитетті күшейту, және дәрігер кеңесіне құлақ асу – дерттің алдын алудың ең тиімді жолдары екенін ескертеді.