8 млн қазақстандық декларация тапсырудан босатылады

Бүгін сенат депутаттары Салық кодексінің жаңа нұсқасына өзгеріс енгізіп, жаңа редакцияда мәжіліске қайтарды. Төменгі палата депутаттары сенаттың ұсыныстарымен келіссе, құжат бірден президенттің қол қоюына жіберіледі. Кодекс аясында жеке тұлғаларды активтері мен міндеттемелері туралы декларация тапсырудан босату қарастырылған.

"Бүгін сенат бұл норманы мақұлдады. Оған сәйкес, 8 миллион қазақстандық декларация тапсырудан босатылады. Соның ішінде жай жалақы және әлеуметтік көмек алатын жеке тұлғалар бар. Ондай адамдардың жалпы саны - 8 млн. Бүгінде бізде процестердің басым бөлігі цифрландырылған. Оған қоса, тауарлардың 87 проценті қолма-қол ақшасыз сатып алынады. Бізде барлық мәлімет бар. Сондықтан жеке тұлғаларды декларация тапсырудан босатуға шешім қабылданды", - деді қаржы вице-министрі Ержан Біржанов журналистерге берген сұхбатында.

Оның айтуынша, бүгінде жұмыс берушілер өз жұмысшылары үшін барлық салықты төлейді. Қаржы министрлігі бәрін онлайн режимде көре алады. Сондықтан ондай жұмысшыларға декларация да тапсырудың қажеті жоқ.