Қытайлық Volvo компаниясының иесі Geely Auto Group аккумуляторларды зарядтау тиімділігін арттыру үшін жасанды интеллектті пайдаланып жатыр.
Фото: Geely
ERNUR.KZ. Нақты сынақтар барысында компанияның электромобильдері аккумуляторды 10%-дан 70%-ға дейін небәрі 4 минут 30 секундта зарядттады, деп жазады stan.kz.
Бұл бәсекелес компания BYD шығарған ең жылдам электр көлік аккумуляторынан да тез. BYD аккумуляторы 10%-дан 70%-ға дейін небәрі бес минутта қуатталады.
Geely компаниясының мәліметінше, Geely Smart Charging жүйесінің негізінде Xingrui PowerMind деп аталатын жасанды интеллектке негізделген ақылды энергия басқару жүйесі жатыр. Оны Geely Auto Group пен StepFun компаниялары бірлесіп әзірлеген.
PowerMind электромобиль, аккумулятор, қуаттау станциясы, бұлтты сервистер, электр желісі және энергия сақтау жүйесінің жұмысын бір-бірімен үйлестіреді. Соның арқасында көлікті қуаттау процесі жылдам әрі тиімді жүргізіледі.
Geely компаниясы электромобильді жылдам қуаттау жүйесін жасау үшін жасанды интеллект технологиясын қолданды.
Жүйе аккумулятордың температурасы көтерілгеннен кейін ғана әрекет етпейді. Жасанды интеллект аккумулятордың алдағы 30 секундтағы температурасын алдын ала болжап, қуаттау жылдамдығын автоматты түрде реттей алады.
Компанияның мәліметінше, қуаттау кезінде аккумулятордың орташа температурасы 55°C-тан төмен, ал ең жоғары температурасы 65°C-тан аспайды.
Бұл үшін қуаттау жүйесінде бес бөліктен тұратын сұйықтықпен салқындату технологиясы қолданылады. Ол аккумулятордан бастап қуаттау станциясы, қуаттағыш құрылғы, кабель, қуаттау порты және аккумулятор блогына дейінгі бүкіл жүйедегі жылуды реттейді.
Жаңа жүйені тексеру үшін компания оны Lynk & Co 10 және Zeekr 001 көліктерін де сынап көрді.
Сынақ нәтижесінде екі көліктің де аккумуляторын 10%-дан 70%-ға дейін 5 минутқа жетпей, ал 10%-дан 97%-ға дейін 8 минут 40 секундта қуаттауға болатыны анықталды.
“Бұл технология қуаттау уақытын қысқартып қана қоймай, аккумулятордың қызмет ету мерзімін де ұзартуға мүмкіндік береді”, – деп түсіндірді компания.
Жүйе әр көліктің және аккумулятордың ерекшеліктеріне қарай жеке қуаттау режимін таңдайды. Ол қуаттың ең жоғары деңгейін, салқындату қарқындылығын және қуаттау уақытын автоматты түрде реттейді.
Сонымен қатар Geely жүйесінде литий-ионды аккумуляторларды қалпына келтіру технологиясы бар. Ол бірнеше рет жылдам қуаттау кезінде аккумулятордың теріс электродтарында жиналып қалатын литий иондарын қайта белсендіру үшін өте қысқа электр импульстарын пайдаланады.
Geely компаниясының мәліметінше, осы технологиялардың барлығы аккумулятордың қызмет ету мерзімін 20%-ға ұзартады.
Бұл жаңалық Geely компаниясының бәсекелесі BYD Ұлыбританияда жыл соңына дейін 300 жылдам қуаттау станциясын орнатуды жоспарлап отырғанын хабарлағаннан кейін үш ай өткен соң шықты. Ал 2027 жылға қарай олардың санын 600-ге жеткізу жоспарланған.
Бұл заманауи қуаттау құрылғылары BYD-дің Denza брендіне тиесілі сауда орындарына және қазірдің өзінде жұмыс істеп тұрған қуаттау станцияларының аумақтарына орнатылады.
Қытайлық электромобиль өндірушісі жаңа технология көлікті бензинмен толық бак толтырғандай жылдам қуаттауға мүмкіндік беретінін мәлімдеді.
Мұндай жоғары жылдамдыққа жаңа қуаттау құрылғысы арқылы берілетін 1,5 МВт қуаттың арқасында қол жеткізуге болады.
Бұл көрсеткіш көптеген электромобильдерде, соның ішінде Tesla көліктерінде қолданылатын 150 кВт жылдам қуаттау құрылғыларынан 10 есе жоғары. Мұндай қуат шамамен 5000 үйді электр энергиясымен қамтамасыз етуге жетеді.
Стандартты CCS коннекторы бар кез келген электромобиль мұндай станцияға қосылып, аккумуляторы мүмкіндік берсе, өте жоғары жылдамдықпен қуаттала алады.
Алайда BYD компаниясының мәлімдеуінше, ең жоғары қуатқа қол жеткізу үшін арнайы бағдарламалық жасақтама мен жаңа Blade Battery 2.0 аккумуляторы қажет.
