Түркістан облысында күріш егістігіне жаңа технология енгізіліп жатыр

Түркістан облысында күріш егістігіне жаңа технология енгізіліп, су үнемделуде, деп хабарлайды ERNUR.KZ.

Түркістан облысында су үнемдеу технологиялары жүйелі түрде енгізіліп келеді. Бұл бағыттағы жұмыстар облыс әкімі Нұралхан Көшеров қадағалауында.

2025 жылы «Таймас-2024» ЖШС Отырар ауданындағы Қарғалы ауыл округінде 400 гектар алқапқа күрішті тамшылатып суғару әдісімен егіп, әр гектарынан орта есеппен 50 центнер өнім алды. 2026 жылы бұл тәжірибені кеңейтіп, тағы 200 гектарға енгізу жоспарланып отыр.

Ерекше атап өтерлігі – күріш елімізде пилоттық негізде алғаш рет дәл осы тамшылатып суару тәсілімен егілді. Дәстүрлі әдісте бір гектар күрішке 26 мың текше метрге дейін су жұмсалса, жаңа технология арқылы бұл көрсеткіш шамамен 15 мың текше метрге дейін төмендеді. Яғни, су шығыны екі есеге жуық азайды. Бұл – су ресурстарын тиімді пайдалану жолындағы нақты нәтиже.

Ылғал сүйгіш дақылдардың тиімділігін арттыру мақсатында мақта егісінде де жаңа тәсілдер белсенді қолданылуда. 2024 жылы мақта 105,2 мың гектарға дәстүрлі әдіспен, 1,2 мың гектарға жаңа технологиямен егілсе, 2025 жылы керісінше, жаңа технология көлемі 52,2 мың гектарға дейін ұлғайды. Нәтижесінде гектарына 60 центнерге дейін өнім алынып, 89,3 млн м³ су үнемделді. 2026 жылы мақта дақылын жаңа технологиямен 87 мың гектарға дейін жеткізу жоспарланған.

Жалпы, енгізіліп жатқан заманауи әдістер күріш пен мақта өнімділігін арттырып қана қоймай, су тапшылығы жағдайында әрбір текше метр суды тиімді пайдалануға мүмкіндік беріп отыр.