Шымкентте желтоқсан айында бірқатар мерекелік іс-шаралар өтеді

26.11.2025 19:20

Қалада өтетін бұл шаралар тұрғындарға көтеріңкі көңіл күй сыйлап, мәдени өмірдің жандануына серпін береді деп күтілуде.

Желтоқсан айында Шымкент қаласында тұрғындар мен қонақтар үшін мазмұнды мәдени бағдарлама ұсынылады.

Бұл туралы бүгін Өңірлік коммуникациялар қызметі алаңында өткен брифингте Шымкент қаласы әкімдігінің ресми өкілі, қала әкімінің орынбасары – Сәрсен Абайұлы Құранбек мәлімдеді.

6 желтоқсан сағат 11:00-де Ж.Шанин атындағы академиялық қазақ драма театрында оқушылар арасындағы «Мен елімді жырлаймын» республикалық айтысы өтеді. Айтысқа еліміздің барлық өңірлерінен келген жас ақындар қатысып, өз өнерін көпшілікке ұсынады.

9–10 желтоқсан күндері «Қызғалдақ» сарайында «Шымкент сазы» республикалық эстрадалық ән байқауы ұйымдастырылмақ. Байқауда елдің түкпір-түкпірінен іріктелген жас орындаушылар оңтүстік композиторларының шығармаларын және еркін тақырыптағы эстрадалық әндерді орындайды.

Жаңа жылдық мерекелік бағдарламалар 21 желтоқсанда «Астана» алаңында өтетін шырша шамын жағу рәсімімен басталады. Ал 31 желтоқсан күні осы алаңда жергілікті өнерпаздар мен танымал жұлдыздардың қатысуымен жаңа жылға арналған гала-концерт пен мерекелік отшашу ұйымдастыру жоспарланып отыр.