Небәрі 15-ақ минут арнайсыз.
Фото: pexels.com
Еңбек демалысынан кейін де шаршау басылмай, ұйқышылдық қысып, әлсіздік мазалай ма? Бұл – ағзаның энергия қоры азайып, жүйке жүйесінің толық қалпына келмегенінің белгісі. Мұндай кезде ең тиімді тәсілдердің бірі – таңертеңгі 15 минутты өзіңізді қуаттандыруға арнау.
Таңертеңгі қысқа, бірақ әсері ұзаққа созылатын медитация сіздің санаңызды «оң толқынға» қояды, көңіл-күйіңізді көтереді, денеңізді энергиямен толтырады.
Төменде үш медитациядан тұратын таңғы кешен берілген. Оны бар болғаны 15 минутта жасап шығасыз.
1-медитация: Жүректегі жылу (5 минут)
Бұл – эмоционалды тепе-теңдікті қалпына келтіретін және қуаныш сезімін оятатын медитация. Жағымды естеліктер – миды белсендіреді. Бұл серотонин мен дофаминнің бөлінуін арттырып, шаршауды азайтады.
Қалай жасалады:
- Ыңғайлы отырып, көзіңізді жұмыңыз.
- Қолыңызды жүрек тұсына қойыңыз.
- 5 секунд мұрынмен терең дем алыңыз → 5 секунд ауызбен баяу шығарыңыз.
- Бір қуанышты, бақытты сәтті еске түсіріңіз. Сол естелік жүрегіңізді жылытып, бойыңызды мейірімге толтырсын.
- Осы сезімді 5 минут бойы сақтаңыз.
2-медитация: Күн энергиясымен толтыру (5 минут)
Бұл әдіс шаршаған денені жылы энергиямен оятып, күш-қуатты арттырады. Ішкі ресурсты белсендіреді.
Қалай жасалады:
- Тыныш, жайлы жерде отырып немесе жатыңыз.
- Көзіңізді жұмыңыз.
- Мұрын арқылы 4 секунд дем алыңыз → 4 секунд ұстап тұрыңыз → 6 секунд ауызбен шығарыңыз. Оны 3–4 рет қайталаңыз.
- Күннің алтын сәулелері басыңыздан аяғыңызға дейін құйылып, бойыңыздағы ауырлықты кетіріп, энергиямен толтырып жатқанын елестетіңіз.
- Іштей немесе сыбырлап: «Мен энергияға толымын. Мен күштімін. Мен сергекпін» деп қайталаңыз.
- 5 минуттан соң көзіңізді жаймен ашып, бірнеше терең тыныс алыңыз, денеңізді жеңіл созыңыз.
3-медитация: Қуат демі (5 минут)
Бұл – ағзаны тез оттегімен қанықтыратын, ұйқышылдықты кетіретін әдіс. Оттегінің артуы – мидың жұмысын жеделдетіп, ұйқышылдықты азайтады, реакция жылдамдығын арттырады.
Қалай жасалады:
- 30–40 рет терең дем алыңыз (кеудені және ішті толтырып, ауаны еркін шығарыңыз).
- Соңғы демді шығарғаннан кейін 30–60 секунд тынысты ұстап тұрыңыз.
- Бір терең дем алып, 15 секунд ұстап, қайта шығарыңыз.
- Бұл циклді 2 рет қайталаңыз.
Егер осы үш медитацияны күн сайын жасасаңыз, 7–10 күн ішінде:
- таңертең жеңіл тұрасыз,
- көңіл-күйіңіз жақсарады,
- физикалық шаршау азаяды,
- миыңыз сергек жұмыс істей бастайды.
Ал егер тұрақты әдетке айналдырсаңыз, күніңіз энергия мен шабытқа толы болады.
Дайындаған: Ж. Смағұлова,
Тағы да оқыңыз:
