5 қыркүйекте Ерболат Жанәбіловтің ісі бойынша сот отырысы өткен.
фото: Іnstagram_zhanabylov_e
ERNUR.KZ. Астанада блогер Ерболат Жанәбіловтің жұбайы Эльмира Төлегеноваға қатысты сот процесі жалғасып жатыр, деп жазады azattyq-ruhy.kz.
Құмар ойындары мен лотерея қызметі саласындағы мониторинг және құқық қолдану практикасы басқармасының жетекшісі Әбдел Балтатегінің айтуынша, Төлегенованың әрекеттерінен қылмыстық жазаланатын істердің белгілері анықталған.
"Сот талқылауы барысында әкімшілік іс жүргізу аясында жауап беруге болмайтын бірқатар сұрақтар туындады. Мәселен, "Жана Бизнес" ЖШС-нің қандай құндылығы бар, қандай да бір қауымдастықтар бар ма, ұсынылған курстардың құны қанша, неге жеңімпазды анықтау тікелей эфирдегі жүйеге емес, автоматтандырылған бағдарламаға жүктелген, сондай-ақ бағдарламада қандай алгоритм жазылған? Мұның бәрі алаяқтық немесе заңсыз кәсіпкерлік қызметтің белгілерін көрсетеді", — деді Балтатеги.
Осыған байланысты басқарма өкілі Төлегеноваға қатысты әкімшілік іс жүргізуді тоқтатып, материалдарды сотқа дейінгі тергеу органына жолдауды ұсынды. Тергеушілер бұл істе Қылмыстық кодекстің 214-бабы (Заңсыз кәсіпкерлік қызмет) және 190-бабы (Алаяқтық) бойынша қылмыстық белгілердің бар-жоғын анықтауға тиіс.
Сот процесі жалғасып жатыр, оның ары қарайғы дамуы істің қайта саралануына және қылмыстық жауапкершілікке әкелуі мүмкін.
Айта кетейік, 5 қыркүйекте Ерболат Жанәбіловтің ісі бойынша сот отырысы өткен. Ол кезде блогердің жұбайы Эльмира Төлегеноваға залдан шығуды өтінген, ал одан кейінгі жауап алу барысында қайта шақырған. Төлегенова жауап беруден бас тартқан.
Еске салайық, 18-21 тамыз аралығында Жанәбіловтер автокөлік ұтыс ойынын жариялағанын жазған едік. Жазылушылар тікелей эфирді күтті, алайда оның орнына 30 мың теңгелік ақылы оқу курсының сілтемесін алған. Ұтысқа қатысу үшін курсты сатып алу міндеттелген. Бұл әрекеттер әлеуметтік желі қолданушыларының жаппай наразылығын тудырып, мемлекеттік органдарға шағымдануына себеп болды. Туризм және спорт министрлігі лотерея өткізу мен билет таратуға тек ресми ұйымдастырушылардың ғана құқығы бар екенін еске салды. Осыдан кейін блогерлерге қатысты заңнаманы бұзу деректері бойынша істер қозғалған еді.
