Қорқынышты фильмдер көрсетілетін уақытта попкорн сатылымы артады
Сурет: ЖИ
Кинотеатрға барғанда билет қана емес, попкорн сатып алу міндетті дағдыға айналған. Оның қытырлаған дыбысы мен ерекше дәмі кино көрудің өзіндік атмосферасын қалыптастыратындай. Тіпті кейбіреулер үшін кинотеатрға бару попкорнның дәмін татудан басталатындай көрінеді.
Бір қызығы, кино мен попкорнның бүгінгідей ажырамас жұпқа айналуы кездейсоқ емес. Қарапайым жүгері дәні қалайша әлемдік кино мәдениетінің символына айналғанын білесіз бе? Ал бір кездері кинотеатрларда попкорн сатуға рұқсат берілмегенін ше?
Кинотеатрлардың алғашқы кезеңінде бұл тағамға көзқарас мүлде басқаша болған. ХХ ғасырдың басында кинотеатрлар сән-салтанаты келіскен, әдемі кілем төселген ерекше орын саналған. Кинозал иелері көрермендердің залда тамақ жеп, еденді ластағанын қаламаған. Оның үстіне, үнсіз фильмдер көрсетілген кезде попкорнның сықырлаған дыбысы өзгелерге кедергі келтіруі мүмкін еді.
Сондықтан попкорн сатушылар кинотеатрдың ішіне кіре алмай, көшеде немесе ғимараттың алдында сауда жасаған. Тіпті кейбір кинотеатрларда көрермендерден попкорндарын сыртта қалдыруды сұраған.
Попкорнның кинотеатрлармен жақындасуына 1930 жылдардағы АҚШ-тағы Ұлы экономикалық дағдарыс үлкен әсер етті. Бұл кезеңде халықтың тұрмысы қиындап, адамдар қымбат ойын-сауықтан бас тартуға мәжбүр болды. Ал кино көру көпшілік үшін қолжетімді демалыстың біріне айналды.
Дәл осы уақытта попкорнның танымалдығы арта бастады. Себебі ол арзан, тез дайындалатын әрі көпшіліктің қалтасы көтеретін тағам еді. Кинотеатрлар да қосымша табыс табудың жолын іздеп, өздері попкорн аппараттарын орната бастады. Осылайша, шағын ғана тіскебасар кинотеатрлардың табыс көзіне айналды.
Попкорнның танымалдығы Екінші дүниежүзілік соғыс кезінде де арта түсті. Өйткені сол уақытта қант тапшылығына байланысты тәттілерді өндіру мен сату қиындады. Ал попкорнға мұндай шектеу қойылмағандықтан, ол көрермендердің сүйікті тағамдарының бірі болып қала берді.
Дегенмен попкорн барлық елдің кинозалдарында танымал деп ойламаңыз. Әлемнің әр түкпірінде көрермендер фильм тамашалау кезінде өздерінің ұлттық тағамдары мен сүйікті тіскебасарларын жегенді ұнатады.
Мәселен, Жапонияда кинотеатрдың басты символы – суши мен жеңіл тіскебасарлар. Үндістандық көрермендер самоса, пакора секілді ұлттық тағамдарды таңдайды. Ал Оңтүстік Кореяда кептірілген теңіз өнімдері мен кимчи дәмі қосылған тіскебасарлар кездеседі. Еуропа елдерінде тәттілерден бастап, начос пен түрлі жергілікті жеңіл тағамдарға сұраныс жоғары. Осыдан-ақ кинотеатрдағы тағам таңдауы әр халықтың мәдениеті мен ас мәзіріне байланысты екенін байқауға болады.
- Кинотеатр қызметкерлері бір қызық заңдылықты байқаған. Қорқынышты фильмдер көрсетілетін уақытта попкорн сатылымы жиі артады екен. Мұның себебі ғалымдардың түсіндіруінше, шайнау әрекеті адамды біршама тыныштандыруы мүмкін. Ал экрандағы қорқынышты көріністерден бойды аулақ салудың бір жолы – қолдағы попкорнды қытырлатып жеу болса керек.
Попкорнның кинотеатрлар үшін тағы бір артықшылығы бар. Ол кейде кино билеттерін сатудан түсетін табыстан да жоғары пайда әкелуі мүмкін. Өйткені попкорнды дайындауға кететін шикізат шығыны салыстырмалы түрде аз, ал дайын өнімге сұраныс жоғары.
Әрине, кино көргенде жеуге болатын тағам көп. Чипсы, шоколад, жаңғақ, басқа да түрлі тәттілер бар. Бірақ попкорнның өзіне тән артықшылықтары жеткілікті. Ол киноның мазмұнын өзгертпесе де, тамашалау сәтін ерекше етеді. Сондықтан бұл қытырлақ тағамның кинотеатрдағы орнын жақын арада басқа бір тіскебасардың алмастыруы оңай емес сияқты. Үлкен экран, сапалы дыбыс, сүйікті актерлер және, әрине, бір құты попкорн! Осылардың барлығы кино көру әсерін толықтыра түседі.
Дайындаған: Х. Орал,
ОҚИ ОТЫРЫҢЫЗ:
