Семейде өзін мүгедек етіп көрсеткен ер адам қамауға алынды

Ол Засядко көшесіндегі сауда үйлерінің бірінің маңында отырған. Ер адам инсульт алған адамның кейпіне еніп, азаматтардың аяушылық сезімін тудырып, алдап келген. Айталық, қоғам белсенділерінің бірі бұл адам шынымен көмекке мұқтаж деп ойлап, материалдық көмек көрсеткен.

"Алайда кейіннен бұл адамның мүгедек еместігін тұрғындардан естіген, оның денсаулығында ешқандай ақау жоқ екендігі туралы ақпарат алған", - дейді полицейлер.

Ол қайыр сұрағаны үшін әкімшілік жауапкершілікке тартылды. Семей қаласының мамандандырылған әкімшілік сотының шешімімен бес тәулікке әкімшілік қамауға алынды.

Ер адам Семей қалалық полиция басқармасының арнайы қабылдау орнында жазасын өтеп шықты.