Павлодарлық әйел өзгенің банк карталары арқылы 100 миллион теңге аударды деген күдікке ілінді

ERNUR.KZ. Павлодарда кәсіпкер әйел қылмыстық жолмен алынған болуы мүмкін 100 миллион теңгеден аса қаржыны біреуге аударды деген күдікке ілінді. Тергеу мәліметінше, ол бұл үшін өз қызметкерлерінің банк карталарын пайдаланған. Ал қызметкерлері олардың карталары арқылы ақша аударылып жатқанынан мүлде хабарсыз болған, деп жазады Ulysmedia.kz.

Павлодар облыстық Экономикалық тергеп-тексеру департаментінің мәліметінше, бұл жағдай 2024–2025 жылдары болған. Күдіктінің бірнеше киім дүкені болған. Тергеушілердің пайымдауынша, кәсіпкер әйел бизнесін дамыту үшін төлем жасау қажет деген сылтаумен қызметкерлерін алдап, олардың банк карталарын пайдалануға алған. Бұл туралы «Ирбис» басылымы жазды.

Кәсіпкер әйел қызметкерлеріне бір кассалық аппарат арқылы ірі көлемдегі ақшаны өткізіп үлгермейтінін, ал ақша айналымы көбейсе, қосылған құн салығын (ҚҚС) төлеуге тура келетінін айтқан.

Алайда тергеу нұсқасы бойынша, ол өзгенің банк шоттары арқылы интернет алаяқтықтан және басқа да қылмыстардан түскен ақшаны аударып отырған.

“ Бұл азаматтар өздерінің карталары арқылы ақша аударылып жатқанын білмеген. Кәсіпкер әйел оларға бизнесін дамыту үшін бір кассалық аппарат үлкен сомаларды өткізіп үлгермейтінін, соның салдарынан қосылған құн салығын төлеуге тура келетінін айтқан. Осыны сылтауратып, қызметкерлерінің банк карталарын алып, интернет алаяқтықтан және өзге де қылмыстардан түскен бөтен ақшаны аударып отырған “, – деді Павлодар облыстық Экономикалық тергеп-тексеру департаменті басшысының орынбасары Ғалиасқар Қасымов.

Қылмыстық іс бойынша тергеу аяқталды. Енді кәсіпкер әйелдің әрекетіне түпкілікті құқықтық бағаны сот береді.