Мемлекет басшысы Cameco корпорациясының президенті Тим Гитцельді қабылдады

ERNUR.KZ. Қазақстан Республикасының Президенті Қасым-Жомарт Тоқаевтың Нью-Йорк қаласына жасаған жұмыс сапары аясында канадалық Cameco корпорациясының президенті Тим Гитцельмен кездесуі өтті. Келіссөз барысында тараптар уран өндіру және атом энергетикасы саласындағы өзара ынтымақтастықтың қазіргі ахуалы мен болашағын талқылады.

Мемлекет басшысы Қазақстан мен Cameco арасындағы әріптестіктің ұзақ жылдар бойы қалыптасқан берік негізге ие екенін атап өтті. Президенттің айтуынша, канадалық трансұлттық компания еліміздің уран өнеркәсібінде сенімді және стратегиялық серіктес ретінде танылған. Cameco Қазақстан аумағында жұмыс істеген жылдар ішінде 500 миллион доллардан астам инвестиция құйып, жаңа технологиялар мен өндірістік инновациялардың енгізілуіне елеулі үлес қосқан.

Қасым-Жомарт Тоқаев еліміздің энергетикалық стратегиясына тоқтала келе, Қазақстан қазір энергия көздерін әртараптандыру және заманауи экологиялық талаптарға сай шешімдерді енгізу кезеңіне өткенін айтты. Президент алдағы уақытта Қазақстанда үш атом электр стансасын салу жоспарланып отырғанын мәлімдеп, бұл бағытта халықаралық серіктестермен, соның ішінде Cameco сияқты тәжірибелі компаниялармен өзара іс-қимылдың маңыздылығын атап өтті.

Мемлекет басшысы Қазақстанның атом энергетикасын дамытуда қауіпсіздік, инновация және жоғары технологиялар қағидаттарына сүйенетінін айтты. Сонымен қатар ол Cameco корпорациясының тәжірибесі мен техникалық әлеуеті еліміздің атом саласындағы әлеуетін арттыруға мүмкіндік беретінін жеткізді.

Өз кезегінде Тим Гитцель Қазақстанмен ұзақ мерзімді ынтымақтастықты жоғары бағалайтынын және Cameco компаниясы еліміздегі жобаларды одан әрі кеңейтуге мүдделі екенін айтты. Ол Президентке Түркістан облысында орналасқан «Инкай» бірлескен кәсіпорнының қазіргі қызметі мен даму жоспарлары жөнінде ақпарат берді. Аталған кәсіпорын ширек ғасырдан бері уран өндіру саласында табысты жұмыс істеп келеді және Қазақстанның әлемдік уран нарығындағы жетекші орнын сақтауға елеулі үлес қосып отыр.

Кездесу соңында тараптар өзара әріптестікті жаңа деңгейге көтеру, инновациялық технологияларды енгізу және Қазақстанның ядролық энергетика саласындағы әлеуетін арттыру бағытында ынтымақтастықты жалғастыруға уағдаласты.