Маңғыстауда қуаттылығы 150 млн текше метрлік жаңа газ жобасы іске қосылды

0
157

Жобаның алғашқы кезеңінде газ өндіру көлемі жылына шамамен 50 млн м³ құрайды, ал болашақта бұл көрсеткіш 150 млн м³ дейін ұлғаяды.


Маңғыстауда қуаттылығы 150 млн текше метрлік жаңа газ жобасы іске қосылды

ERNUR.KZ. Маңғыстау облысындағы Тасбулат кен орнында жаңа газ жобасы іске қосылды. Оның мақсаты – энергетикалық тәуелсіздікті нығайту, ішкі ресурстық базаны кеңейту және өңірлердің әлеуметтік-экономикалық дамуын қамтамасыз ету, деп хабарлайды ҚР Энергетика министрлігі.

Жобаның алғашқы кезеңінде газ өндіру көлемі жылына шамамен 50 млн м³ құрайды, ал болашақта бұл көрсеткіш 150 млн м³ дейін ұлғаяды. Шикізат «Қазақгаз өңдеу зауыты» ЖШС қуаттылықтарында өңделіп, «QazaqGaz» ҰК» АҚ-ға жеткізіледі.

Жобаны іске асыру «QazaqGaz» ҰК» АҚ, «ҚазМұнайГаз» ҰК» АҚ және «Қазақ газ өңдеу зауыты» ЖШС-мен бірлесіп атқарылған ынтымақтастықтың арқасында мүмкін болды. Энергетика министрлігі жобаның барлық кезеңін тікелей қолдап, үйлестіріп отырады.

Жобаның іске қосылуы өңірдің өнеркәсіптік әлеуетін арттырып, жаңа жұмыс орындарын ашуға және халықты қолжетімді энергия ресурстарымен қамтамасыз етуге мүмкіндік береді. Жақын арада Қызылорда және Атырау облыстарында да осыған ұқсас жобаларды іске қосу жоспарланып отыр, бұл газ өндіру мен өңдеу көлемін айтарлықтай арттыруға септігін тигізеді.