Мафияның кегі: Амантай қажы әйел адамды не себепті итеріп жібергенін айтты

06.08.2025 12:14

Алматы Полиция департаментінің мәліметінше, бұл оқиға бойынша ҚР Қылмыстық кодексінің 107-бабы ("Денсаулыққа қасақана орташа ауырлықтағы зиян келтіру") бойынша тергеу амалдары жүргізіліп жатыр.

Фото: Tengrinews.kz

ERNUR.KZ. Әйелді баспалдақтан итеріп жіберді деп айыпталған қоғам қайраткері, антиядролық қозғалыс белсендісі Амантай қажы оқиғаға қатысты өз нұсқасын айтты, деп жазады tengrinews.kz.

Ақсақалдың айтуынша, сол күні таңертең ол спорт кешеніне жаттығуға келген. Сол жерде жапа шеккен әйелмен кездескен. Қажының айтуынша, әйел оны құшақтаған, ол қолын кері тартып алған, содан кейін әйел құлап қалған.

"Ол құлайын деп, мені жанына шақырғысы келді. Мен оны әйел адамның айласы деп ойладым да, тоқтамай, жаттығуға кетіп қалдым... Оны біреулер ақшаға сатып алған", – дейді Амантай қажы.

Ол бұл оқиғадан кейін ешқандай қылмыстық іс қозғалмағанын мәлімдеді.

"Қылмыстық іс жоқ. Бұл маған қарсы жасалған арандату... Бұл – жемқорлық, маған мафия кек қайтарып жатыр", – дейді ақсақал.

Еске салайық, шілде айында әлеуметтік желілерде әйелді баспалдақтан итеріп жіберді делінген видео тараған болатын. Видеода 83 жастағы Амантай қажы – белгілі қоғам қайраткері әрі антиядролық қозғалыс белсендісі ретінде танылған адам.

БАҚ деректеріне сәйкес, жапа шеккен әйел – 76 жастағы Биғайша Бектенбаева, ол спорт кешенінде медбике болып жұмыс істейді. Әйелдің айтуынша, таңертең Амантаай қажыны кіреберісте көріп сәлемдескен. Алайда ақсақал жауап орнына оны итеріп жіберіп, артына қарамастан кетіп қалған. Құлау салдарынан әйелдің жамбас сүйегі сынып ауруханаға жатқызылды.

Полиция не дейді?

Аталған бап бойынша жаза:

1000 АЕК-ке дейін айыппұл (2025 жылы бұл 3 932 000 теңгеге дейін),
немесе түзеу жұмыстары,
немесе 600 сағатқа дейін қоғамдық жұмыстар,
немесе екі жылға дейін бас бостандығынан айыру.