Басты себептер – субсидиялау тоқтатылды, жем-шөп қымбаттады, жалақы өсті, сыртқы нарықтағы сұраныс артып келеді.
фото: Sputnik / Санат Имангалиев
ERNUR.KZ. Қазақстанда 7 айда 608,8 мың тонна ет өндірілді, деп жазады sputnik.kz.
Сиыр еті қымбаттап, ішкі нарықта ет тапшылығының болу ықтималдығына қатысты алаңдаушылық туып отыр. Алайда динамика тұрақты, дейді министрлік.
"Шілде айының соңындағы жағдай бойынша ірі қара 8,7 млн басқа жетті, оның 4,5 миллионы сиыр. Бұзау саны 2,7 млн басқа дейін өсті. Бұл өндіріс көлемін одан әрі арттыруға негіз болады", - дейді ведомство.
Қаңтар-шілде айларында елде 608,8 мың тонна ет өндіріліпті. Оның 205,7 мың тоннасы сиыр еті.
Өндірушілерден ірі қара малдың тірідей салмақтағы көтерме бағасы 2400–3100 теңге/кг, бөлшек саудада – 3000–3700 теңге/кг аралығында, өңірлерге қарай өзгеріп отырады.
Баға неге өсті:
селекциялық-асыл тұқымдық жұмысты субсидиялау тоқтатылды,
энергия ресурстары қымбаттады,
жем-шөп, жанар-жағар май қымбаттады,
ветеринарлық препараттар құны артты, АӨК-дегі жалақы көтерілді.
Бұған қоса жеткізумен айналысатын делдалдардың әсері бар.
Сонымен қатар қазақстандық сиыр етіне сыртқы нарықтағы сұраныс артып келеді.
Қаңтар–маусым айларында экспорт көлемі 16,1 мың тоннаны құрап, 2,4 есе өсті.
Негізгі бағыттар:
1. Өзбекстан,
2. Тәжікстан,
3. Қырғызстан,
4. Қытай,
5. БАӘ.
Қазіргі таңда бордақылау алаңдарының жүктемесі 35–40%. Оны арттыру мақсатында 2025 жылғы 1 тамыздан бастап жылдық 5%-бен 12 айға жеңілдетілген кредиттеу бағдарламасы енгізілді. Бұл мақсатқа 50 млрд теңге бөлінді.
Бағдарлама жас малды, жем-шөпті, ЖЖМ мен жабдықты сатып алуды қаржыландырады және бордақылау алаңдарының жүктемесін 60%-ға және одан жоғары деңгейге жеткізуге мүмкіндік береді.
