2025 жылы 12-16 мамыр аралығында елімізде ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның бастамасымен Республикалық репродуктивті денсаулық апталығы өтеді.
ERNUR.KZ. Комиссияның қолдауымен мемлекеттік органдар, медициналық және білім беру мекемелері, үкіметтік емес ұйымдар және халықаралық серіктестердің репродуктивті денсаулыққа, әсіресе, жасөспірімдер мен жастарға жауапкершілікпен қарау мәдениетін қалыптастыру, сондай-ақ жыныстық өмірдің ерте басталу қаупі туралы сенімді ақпарат тарату үшін күш-жігері біріктірілді. ОКҚ алаңында өткен баспасөз конференциясында ұлттық комиссия төрағасының орынбасары, ҚР Парламенті Сенаты Төрағасының кеңесшісі Жұлдызай Ысқақова апталықтың қалай өтетінін айтып берді.
Спикер атап өткендей, ел Президенті репродуктивті денсаулық мәселелеріне ерекше мән береді және қиындықтарға тап болған отбасыларға көмектесуге бағытталған бастамаларды белсенді қолдайды. Бүгінде бұл салада тәуекелдер артып келеді. Оның айтуынша, жауапкершілікті тек мектептерге немесе ата-аналарға жүктемеу маңызды.
«Халықтың денсаулығы – бұл жалпы жауапкершілік және ұлттық әл-ауқаттың негізі. Соңғы бес жылда елде 18 жасқа дейінгі қыздар арасында жүктіліктің шамамен 12 мың жағдайы тіркелген. 15 пен 19 жас аралығындағы жасөспірімдердің үштен бірінің жыныстық тәжірибесі бар, бірақ ЮНФПА зерттеулерінің мәліметтері бойынша олардың көбінде АИТВ және ЖИТС-тен қорғану туралы жеткілікті ақпарат жоқ», – деді Жұлдызай Ысқақова.
Денсаулық сақтау министрлігінің зерттеулеріне сәйкес, инфекция белгілері бар жастардың 60%-дан астамы медициналық көмекке жүгінбейді. Бүгінде Қазақстандағы әрбір алтыншы отбасы бедеулікке тап болады. Бұл ерлерге де, әйелдерге де қатысты. ДДҰ мамандарының пікірінше, мұндай көрсеткіш ұлттық қауіпсіздікке қауіп төндіреді.
«2021 жылдан бастап Президенттің тапсырмасы бойынша «Аңсаған сәби» арнайы бағдарламасы жұмыс істеп келеді, ол бойынша жыл сайын ЭКҰ бағдарламалары бойынша мыңдаған квота бөлінеді. Бұл ашық және ғылыми негізделген диалогты қажет ететін репродуктивтік денсаулық саласында,ы терең проблемаларды бар екенін көрсетеді. Сондықтан акцияның міндеті азаматтарды маңызды бағыттар туралы көбірек ақпараттандыру, сондай-ақ жастардың да, ересектердің де денсаулығына саналы көзқараспен қарауға ынталандыру», – деп атап өтті Жұлдызай Ысқақова.
Апталық аясында бүкіл ел бойынша жастар денсаулық орталықтары мен алғашқы медициналық-санитарлық көмек ұйымдарында Ашық есік күндері, тақырыптық дәрістер, тренингтер мен интерактивті сессиялар, мамандардың қатысуымен онлайн-вебинарлар өткізу жоспарланған. Спикердің мәліметінше, 12-16 мамыр аралығындағы әр күн жеке тақырыпқа арналады. Олардың ішінде: отбасын жоспарлау, әйелдер, ерлер және жасөспірімдер денсаулығы, жыныстық жолмен берілетін инфекцияларға қарсы тұру және адам папиллома вирусы. Апталық қорытындысы бойынша ұсыныстар жиналып, осы саладағы саясатты одан әрі жақсарту бойынша ұсыныстар дайындалады.
